«Өймөкөөн сулустара» ырыа куонкуруһа эһиил Томторго ыытыллыаҕа

Уус-Ньараҕа ааспыт нэдиэлэҕэ «Өймөкөөн сулустара-2023» диэн улуустааҕы вокальнай ырыа куонкуруһа ыытылынна.

Тэрээһиҥҥэ кытта Томтор, Үчүгэй, Төрүт, Үчүгэй нэһилиэктэриттэн, Биэрэк-Үрдэ учаастактан барыта 19 кыттааччы улуус киинигэр кэллэ. Оттон Уус-Ньараттан 6 ырыаһыт кытынна.

Куонкурус сыала-соруга саҥа вокальнай ырыаһыттары талыы, култуурунай тэрээһин таһымын үрдэтии, байыаннай кэм ырыаларын киэҥник тарҕатыы, олохтоох нэһилиэнньэ патриотическай өйүн-санаатын күүһүрдүү буолар.

Толорооччулар күөн күрэскэ иккилии ырыаны толордулар. Самодеятельнай артыыстар куоластарын, сценаҕа тутта-хапта сылдьалларын дьүүллүүр сүбэ сөптөөхтүк сыаналаата.

Быйылгы куонкуруска дьүүллүүр сүбэ саҥа талааннары арыйда. Төрүт нэһилиэгиттэн Василий Ефремов «Нүөмэри бастыҥ толоруу», «Индигир долгуннара» вокальнай бөлөх “Кураж” номинациялар хаһаайыннарынан буоллулар. Федор Шпнев улуустааҕы “Севернай заря-“Хотугу сардаҥа” хаһыаттар анал бириистэринэн наҕараадаланна. Федор Шпнев уонна Дмитрий Винокуров «Көрөөччү биһирэбилэ» бириискэ (спонсордар — Уус-Ньара урбаанньыттара)  тигистилэр.

Оттон Уус-Ньара олохтооҕо Кристина Садыкова сололар икки ардыларыгар кыайыылааҕынан таҕыста.

Томтор нэһилиэгин Оксана Суздалова салайааччылаах «Дьүрүскэн» вокальнай ансаамбыл бастыҥынан ааттанан, кыайыы өрөгөйүн биллэ.

Ансаамбыл кыттыылааҕа Ньургуйаана Дьячкова санаатын маннык тиэртэ:

Бу ырыа куонкуруһа сүрдээх үрдүк таһымнаахтык ааста. Хас биирдии ырыаһыкка дьүүллүүр сүбэ чопчу сыанабылы биэрдэ. Конкурсаннар бары ураты көрүүлээх, кэрэ куоластаахтар диэн сыаналаатым. Биһиги кэлэктииппит кыайыылааҕынан тахсан, эһиил “Өймөкөөн сулустара”  ырыа куонкуруһа Томтор нэһилиэгэр ыытыллыаҕа.

Вокальнай бөлөхтөр истэригэр Үчүгэй нэһилиэгиттэн кэлэ сылдьар «Дьүкээбил» кэлэктиипкэ “Дебют” номинация тигистэ. А.Н.Громов-Агди аатынан этнокультурнай киин дириэктэрэ Аяна Эверстова санаатын истиэҕиҥ:

Биһиги бу «Дьүкээбил» диэн ансаамбылбытын быйыл саас тэриммиппит. Нэһилиэкпит иһигэр ыллыан баҕалаах эдэр кыргыттар элбэхпит.

Бу «Өймөкөөн сулустара-2023» куонкуруска бэйэбитин холонон көрөөрү, инникитин улахан сценаҕа тахсарга уопут мунньунаары кыттарга санаммыппыт.

Үчүгэй нэһилиэгин олохтооҕо, норуот маастара, айар куттаах Мария Винокурова биһиэхэ хоһоон айан биэрэригэр көрдөспүппүт. Онуоха кини «Дьүкээбил суһума» диэн баай ис хоһоонноох айымньыны айан биэрбитэ. Оттон мелодиятын Катя Черкашина толкуйдаабыта. Аранжировкатын Андрей Федоров оҥорбута. Инникитин бу ансаамбылбытын сайыннарыахпыт, өссө да араас куонкурустарга кыттан ситиһиилэниэхпит диэн эрэнэбит. Эһиил Томторго ыытыллар ырыа куонкуруһугар эрдэттэн бэлэмнэнэн кыттыахпыт.  

Евдокия Егорова кэпсэттэ