Ахтар-саныыр Өймөкөөнүм дьоно-сэргэтэ, өрөспүүбүлүкэ хотугулуу-илин оройуонугар эдэр эрчимнээх эрдэхпинэ табыллан үлэлээбит «Өймөкөөн» сопхуоһум үлэһиттэрэ!
Үүнэр 2025 сыл — «Өймөкөөн» сопхуос историятыгар бэлиэ кэм. Күн-дьыл хотоҕос курдук ааһара бэрт түргэн. Мин 1983-1988 сс. сопхуос дириэктэринэн үлэлээбитим. Ити кэмнэргэ Николай Старков, Иннокентий Скрыбыкин, Петр Иванов, Дмитрий Сивцев курдук таһаарыылаахтык үлэлээбит үтүө салайааччылар бааллара. Пиик уонна Арсен Заболоцкайдар, Николай уонна Елена Винокуровтар, Василий Заболоцкайдар, Прокопий Винокуров, Семен Кондаков, Павел Сивцев, Валерий Баранхеев, Екатерина Сивцева, Анатолий Заболоцкай, Фекла Скрыбыкина, Александр Слепцов — бастыҥ исписэлиистэр этэ. Баартыйа кэмитиэтин солбуллубат сэкирэтээрдэринэн — Александр Местников уонна Надежда Николаева, оттон баартыйа хабыньыатын сэбиэдиссэйинэн Галина Платонова уо.д.а. үлэлээбиттэрэ.
Кинилэри барыларын мин үтүө бастыҥ тылларынан куруук санаан-ахтан ааһабын, бииргэ үлэлээбит, алтыспыт дьоммор үтүө доруобуйаны, дьоллоох уһун олоҕу баҕарабын.
Алексей Егорович ФИЛИППОВ,
СӨ тыатын хаһаайыстыбатын үтүөлээх үлэһитэ,
Амма улууһун бочуоттаах олохтооҕо