Саҥа үөрэх дьыла саҕаланара номнуо биир ый хаалла. Кылгас сайын устата үөрэх тэрилтэлэрэ үөрэнээччилэргэ сөптөөх усулуобуйаны тэрийэргэ бары күүстэрин уураллар.
Сордоҥноох орто оскуолатын дириэктэрин э.т. Арина Таркова иһитиннэрэринэн, оскуолаҕа быйыл сайын быстах өрөмүөн үлэтэ ыытылынна. Ол быһыытынан 1-кы кылаас кэбиниэтигэр, дириэктэр хоһугар, сылаас туалеттарга өрөмүөн үлэтэ барда. Бу нэһилиэккэ Куйдуһун муостата алдьанан, киин сиртэн араас матырыйаал кэлэригэр мэһэйдэри көрүстүлэр.
Оскуолаҕа быйыл 1-кы кылааска киирээччи оҕо суох, үөрэнээччи уопсай ахсаана — 37. Манна үбыйыл омук тылын учуутала үлэлии кэлэрэ былааннанар.
Томтор орто оскуолатын дириэктэрэ Алена Егорова этэринэн, үбүлээһин боппуруоһа уустук буолан, быйыл оскуолаҕа сууйуу-сотуу үлэтэ эрэ ыытыллар.
Томтор оскуолатыгар саҥа үөрэх дьылыгар 153 оҕо үөрэниэҕэ. Оскуола боруогун аан бастакытын 18 кырачаан атыллаары долгуйа бэлэмнэнэр. Быйылгы дьылга Томтор оскуолатын кэлэктиибэ физкультура, технология уонна эбии үөрэхтээһин учууталларынан хаҥыаҕа. Саха тылын уонна информатика учууталларын вакансията билигин да аһаҕас. Быйыл оскуоланы 11 оҕо бүтэрбититтэн, 5 оҕо үрдүк үөрэх кыһатын устудьуоннара буоллулар. Орто үөрэххэ туттарсааччылар түмүктэрин бу күннэргэ күүтэбит.
Өймөкөөн орто оскуолатын дириэктэрэ Екатерина Посельская кэпсииринэн, оскуолаҕа сууйуу-сотуу үлэтэ ыытыллыбыт. Аны күһүн оскуолаҕа 7 кырачаан маҥнайгы кылааска үөрэнэ киирэрэ былааннанар. Быйыл Өймөкөөн оскуолатыгар физкультура, история уонна алын сүһүөх кылааһын учууталлара кэлэн үлэлиэхтэрэ. Омук тылын уонна алын сүһүөх кылаас учууталларыгар наадыйаллар. Оскуоланы быйыл бүтэрбиттэртэн үс выпускник орто үөрэххэ туттарсыбыт.
Төрүт орто оскуолатын дириэктэрэ Гаврил Павлуцкай иһитиннэрбитинэн, манна оҕо саадын кырыыһатын иһин баһаартан утары кыраасканан соппуттар. Ону тэҥэ, оскуола иһинээҕи электрическэй уот ситимэ толору уларытылынна, видеонан кэтээн көрүү тэрилэ хас хос аайы турда, 10 түннүгү стеклопакетка уларыттылар. Төрүт орто оскуолатын дириэктэри үөрэх чааһыгар солбуйааччыта Мария Николаева этэринэн, быйыл Төрүт оскуолата 52 оҕолоох саҥа үөрэх дьылын саҕалыаҕа. Маҥнайгы кылааска 6 оҕо кэлиэхтээх. Оскуоланы бүтэрээччилэртэн 1 оҕо үрдүк үөрэххэ киирдэ, 3 орто үөрэххэ докумуоннарын туттарбыт. Манна «Жилье» бырагырааманан дуогабардаспыт технология учуутала үлэлии кэлэрин күүтэллэр.
Үчүгэй орто оскуолатын дириэктэрин э.т. Саргылана Данилова кэпсииринэн, быйыл оскуолаҕа ититии тиһигэр быстах үлэ ыытыллар. Остолобуойга эбии ититэр тиһик батареяларын туруоран биэрдилэр. Билигин оскуола дьиэтин тас өттүттэн ититэр үлэ барар.
Быйыл бу нэһилиэккэ оскуолаҕа 6 оҕо киирэр. 4 выпускник үөрэххэ киирии түмүгүн бу күннэргэ билээри долгуйа сылдьар. Оскуола уопсайа 61 үөрэнээччилээх. Нуучча, омук тылын уонна эбии үөрэхтээһин учууталларын вакансията аһаҕас турар.
Оройуоммут оскуолалара былааннаммыт үлэлэрин ситиһэн, балаҕан ыйын 1 күнүгэр үөрэнээччилэригэр ааннарын тэлэччи аһыахтара.
Ольга Скрыбыкина