Иккис чиэппэр түмүктэнэрэ чугаһаата. Бу үөрэх кэмигэр Н.О. Кривошапкин аатынан Өймөкөөн орто оскуолатын алын кылааһын оҕолоро бары ыытыллыбыт тэрээһиннэргэ көхтөөхтүк кыттан, үгүс ситиһиилэннилэр.
Ол курдук улуустааҕы «Старт» бэстэбээлгэ спортивнай многоборьеҕа биһиги кыраларбыт икки хамаанданы туруоран кииристилэр. Бастакы хамаанда 3-с миэстэни ылан, үөрүүлэрэ үксээтэ. Ол курдук биирдиилээн күрэхтэһиигэ 2-с кылаас үөрэнээччитэ Алина Оконешникова скакалкаҕа чөмпөйүөн үрдүк аатын ылары ситистэ.
Дойдуга бэлиэтэнэр Ийэ күнүн чэрчитинэн оҕолор ийэлэрин кытта «Ночной дозор» диэн квест-оонньууга кытыннылар. Кинилэр спортивнай көрүҥнэргэ, өй күрэҕэр, тыллары, киинэлири таайыыга, викторинаҕа уонна жетон көрдөөһүнүгэр күөн көрүстүлэр. Кыайыылааҕынан Маргарита Николаевна Винокурова уонна Уйгулана Степанова бастаатылар.
Итини таһынан Саха Өрөспүүбүлүкэбитигэр Олоҥхо декадатын чэрчитинэн алын кылаас оҕолоро Сергей Борогонскай «Эрчимэн Бэргэн» олоҥхотуттан быһа тардыыны көрдөрдүлэр. Кырачааннарбыт бэркэ арыллан, оруолларын олус үчүгэйдик оонньоотулар: эрэкэ-дьэрэкэ уолаттар дьиэрэҥкэйдээн ойдулар, кэрэчээн кыргыттар кыталык үҥкүүтүн көрдөрдүлэр, айыы бухатыыра аллараа дойду адьарайдарын кытта 30 күннээх түүн охсуһан, кыайан-хотон, дьоҥҥо-сэргэҕэ улахан үөрүүнү, дьолу-саргын олохтообутунан түмүктэннэ.
Учууталбытыгар Надежда Сергеевнаҕа Чирикова көмөлөспүт атын кылаас салайааччыларыгар, төрөппүттэргэ улахан махталбытын тиэрдэбит.
Найаана КОРЯКИНА,
8-с кылааһын үөрэнээччитэ,
Өймөкөөн