Өймөкөөн нэһилиэгэр үүт соҕотуопката хайдах саҕаламмытын туһунан биһиги «Өймөкөөн Тымныы Оройо» МТ дьаһалтатын тыа хаһаайыстыбатын исписэлииһэ Елена Винокуроваттан билистибит.
— Соторутааҕыта үүт тутар пууну үлэлэтэн саҕалаатыбыт. «Илгэ» СХПК күҥҥэ ортотунан 300-400 кг үүтү туттарар. Биир лиитэрэ үүт сыаната 32 солк. турар. Былырыын эмиэ үүппүтүн маннык сыанаҕа тутар этибит.
СХПХ-ны таһынан, биллэн турар, үүт соҕотуопкатыгар сүрүн тирэҕинэн чааһынайдар буолаллар. Билиҥҥи туругунан нэһилиэккэ үүтү 17 кэтэх хаһаайыстыба туттара сылдьар. Сүөгэйбит 1 лиитэрэтин сыаната 800 солк., арыы 1100 солк. буолан турар. Ону тэҥэ сыахпытыгар суорат, сүөгэй, ымдаан (быырпах), арыы оҥорон атыылыыбыт. Арыы сыаната республика үрдүнэн төһө да үрдээбитин иһин, нэһилиэк олохтоохторо бу бородууксуйаны хото атыылаһаллар.
УЛУУС үрдүнэн үүт соҕотуопкатын туһунан эттэххэ, Биэрэк Үрдүн учаастагар аҕыйах ыал үүт туттарар, Хара-Тумулга эмиэ, онно нэһилиэнньэтэ да аҕыйах буоллаҕа. Томтор, Төрүт, Сордоҥноох нэһилиэктэригэр үүт тутар пууннара суох. Өймөкөөн сэлиэнньэтигэр эрэ биир молоканка үлэлиир.
Олохтоохтор туттарбыт үүттэрин иһин тыа хаһаайыстыбатын бородууксуйатынан аахсаллар эбэтэр сирэй харчынан ый ахсын төлөһөбүт.
Нэһилиэкпитигэр сүөһү ахсаана — 595, онтон ыанар ынаҕа – 192.
Ити курдук сүөһү иитиитигэр үлэ-хамнас кэминэн бара турар. Үүтү сайыҥҥы кэмҥэ эрэ тутабыт, бэс ыйыттан саҕалаан балаҕан ыйын 20-гэр диэри.
Үүт пуунугар үлэһиттэр иккиэбит, лаборант — Антонина Старкова уонна мин эбии үлэм таһынан маастарынан үлэлиибин.
— Өймөкөөн сиригэр-уотугар ынах сүөһү, сылгы ахсаана элбээн иһэригэр баҕарабын. Уонна бары иитимньилэрбит – хороҕор муостаахпыт, сыспай сиэллээхпит – этэҥҥэ эрэ буоллуннар. Бу былдьаһыктаах кэмҥэ оппут үүнүүтэ тубустун, өлгөм үүттээх, үүнүүлээх сайын буоллун, — диэн баҕа санаатын тиэртэ тыа хаһаайыстыбатын исписэлииһэ Елена Винокурова.
Бу туһунан сиһилии «Хотугу сардаҥа» хаһыакка ааҕаарын
Евдокия ЕГОРОВА
Хаартыскалар: Семён Сивцев — Өймөкөөн Сэмэнэ