Олунньу 7 күнүгэр Өймөкөөн нэһилиэгэр «Өймөкөөн улууһа» МТ дьаһалтатын 2023 сыллааҕы үлэтин отчуотун Өймөкөөн оройуонун баһылыгын э.т. Иван Максимов билиһиннэрдэ. Уус-Ньараттан кэлсибит эппиэттээх тэрилтэлэр салайааччылара сүрүн тиэмэлэринэн иһитиннэриини салҕаан, ситэрэн биэрдилэр.
Көрсүһүү кэмигэр нэһилиэнньэттэн киирбит ыйытыыларга тутатына хардаран истилэр. Нэһилиэк хас биирдии учаастагын аайы кыһалҕа араас. Этэргэ дылы, олох баар буоллаҕына, кыһалҕа син баар буоллаҕа.
Ол курдук 42 киһи кыттыылаах мунньах сытыы боппуруостара суолга-иискэ, уу ситимигэр, сибээскэ, тыа хаһаайыстыбатыгар, доруобуйа харыстабылыгар, ОДЬКХ-ҕа о.д.а.туһаайылыннылар.
Саамай сытыы боппуруостары боротокуолга киллэрдилэр. Ол курдук, суотабай сибээһи Биэрэк-Үрдүгэр уонна Хара-Тумулга туруоруу, Өймөкөөҥҥө сибээс хаачыстыбатын тупсарыы наадата мунньахха ыйылынна.
Олохтоохтор Өймөкөөн нэһилиэгэр эдэр исписэлиистэргэ аналлаах 4 кыбартыыралаах олорор дьиэ тутуутун туруорустулар. Оччоҕуна ыччат манна кэлэн үлэлииригэр, олохсуйарыгар бэрт усулуобуйа тэриллиэ этэ.
Саас аайы бу диэки халаан уутуттан эмсэҕэлээһин тахсан үгүс хоромньуну таһаарар, дьон айанныырыгар муоста алдьанан-кээһэнэн дьон мэһэйдэри көрсөр. Онон сытыы кыһалҕаны быһаарарга Индигир өрүс түгэҕин чиҥэтэн биэрии (дноуглубление) уонна сүнньүн уларытан биэрии, итиэннэ Өймөкөөн нэһилиэгэр биэрэги бөҕөргөтүү үлэтин тэрийэргэ эттилэр.
Тыа хаһаайыстыбатын салаатыгар туһааннаахтан – оттооһун кэмигэр көмөҕө диэн мобильнай биригээдэлэри тэрийэн үлэлэтии, ходуһаларга уонна сүөһү мэччийэр сирдэригэр мелиорациялыыр, тупсарар үлэни тэрийии суолталааҕын туруорустулар.
Доруобуйа харыстабылыгар көтөҕүллүбүт сытыы боппуруоһунан Томтор нэһилиэгэр кииннээн, рентген кабинет арыллара буоллар диэтилэр. Ити курдук отчуот күнүгэр олохтоохтор Өймөкөөн нэһилиэгин инники сайдыытыгар туһааннаах араас этиилэри киллэрдилэр. Кинилэр нэһилиэнньэттэн киирбит ыйытыктар, этиилэр боротокуолга илии баттанан, сүтэн-симэлийэн хаалбакка, салҕыы быһаарыллан олоххо киириэхтэрэ диэн эрэнэллэрин биллэрдилэр.
Сиһилии «Хотугу сардаҥа» хаһыакка ааҕыҥ
Евдокия Егорова