Олорпот, туруорбат түгэннээх,
Олус да түбүктээх-садьыктаах
Олуһун Аар Саарга аатыран
Олоҥхо Ыһыаҕа дьэ, ааста!
Эрдэттэн салама бэлэмнээн,
Элбэх да олбоҕу тигэттээн,
Эрдэҕэс оҕолор, саастаахтар,
Эдэрдэр — дьон бары турунна!
Кыраһын таҥастан таҥыллан,
Көстүүмнэр кэккэлээн истилэр.
Кыһыҥҥы кэмнэртэн хомуллан,
Кус, куобах, сибиэһэй ас — бэлэмнэр!
Өймөкөөн Томторун күөнүгэр,
Өйдөбүл өрөгөй күнүгэр —
Олоҥхо Ыһыаҕын аатыгар,
Урааҥхай барыта түмүстэ!
Олуһун даҕаны астынна,
Олоҥхо Ыһыаҕар кэлбит дьон!
Өргөстөөх хайалаах, «кытыы сир» —
Өймөкөөн — бар дьону сөхтөрдө!
Өймөкөөн бар дьону сөхтөрдө,
Өрөгөй түмсүүлээх дьонунан!
Сахаҕа, омук да ыалдьыкка,
Саҥаны-элбэҕи арыйда!
Өймөкөөн бар дьону сөхтөрдө —
Аргыардаах кыһынын таһынан —
Өҥүрүк уот куйаас күнүнэн,
Алгыстаах Хороту күөлүнэн!
Өймөкөөн бар дьоҥҥо көрдөрдө,
Өргөс дьон бу сиргэ баалларын
Айанньыт Дугуйдаан Хоһууну,
Сылгыһыт эр бэрдэ дьоннору!
Краповай берети анньыммыт,
Хапсаҕай аатырбыт тустуугун,
Уруйдуу дьон-сэргэ көрүстэ
Рустаамы — уордьаннаах Буойуну!
Эльбрус чыпчаалын айааһаан,
Өргөһүн Евгений баһылаан
Сахабыт былааҕын күөрэтэн,
Сахалар ааттарын ааттатта!
Өймөкөөн бар дьоҥҥо көрдөрдө
Ис дьиҥин! Ураты буоларын!
Итэҕэттэ — Айыылар тыыннара,
Өссө да үлбүйэр кыахтарын!
Бу маннык аатырбыт Ыһыаҕы
Биһиги, Өймөкөөн дьонноро,
Өйдөбүл, суон сурах оҥорон —
Өрөгөй тыыннааммыт ыстыбыт!
Өймөкөөн Айар Тыын дьонугар —
Өссө биир Аартыкпыт аатырар,
Өргөскө чочуллан ахтыллар,
Өрөгөй күнүнэн — ЭҔЭРДЭ!
Егор Находкин, Төрүт