Соторутааҕыта биир дойдулаахпыт, альпинист, сахалартан бастакынан планета саамай үрдүк чыпчаалыгар — Эверест хайаҕа дабайбыт Евгений Кривошапкин уонна кини курдук халлааҥҥа харбаспыт үрдүк хайаларга сылдьар дьарыктаах хамаанда дьоно Муомаҕа «Победа» чыпчаалыгар тахса сырыттылар.
СӨ Ил Дархана Айсен Николаев 2023 сыллаахха Өймөкөөн улууһугар ыытыллыбыт Олоҥхо Ыһыаҕар кэлэ сылдьан Евгенийга үөрүүлээх быһыыга-майгыга хомус бэлэхтээбитэ.
— Мин от ыйын 28 күнүгэр Айсен Сергеевич бэлэҕин Победа хайаҕа илдьэ тахсан, дуорааннаахтык тыаһаппытым олоҕум өссө биир кэриэ-бэлиэ түгэнинэн буолла. Маны тэҥэ биһиги хамаандабыт сүрүн сыалынан биир интэриэстээхтэр мустан уопут атастаһыыта, төрөөбүт кыраайбыт туохха да тэҥнэммэт кэрэ айылҕатыгар дуоһуйан туран сылдьыы, хотугу дойдубутунан киэн туттуу, киниэхэ сүгүрүйүү буолар, — диэн кэпсээтэ Евгений.
Бөлөхпүт састааба 10 киһилээх этэ. Оттон хайаҕа ахсыа буолан тахсыбыппыт.
Урут хайа экспедициятыгар орто саастаах эрэ дьон сылдьаллара. Кэлиҥҥи кэмҥэ туризм бу көрүҥүн эдэр ыччат интэриэһиргиир буолбута кэрэхсэбиллээх.
Победа чыпчаалыгар тахсыбыт Дьокуускайтан, Чурапчы, Муома улуустарыттан сылдьар Василий Перевалов, Альбина Григорьева, Надежда Стручкова, Айаал Гаврильев, Наталья Неустроева, Сандаара Пермякова, Леонид Никулин, Екатерина Копырина, Анастасия Никифорова Уус-Ньара Афродитатыгар, Өймөкөөн улууһун Муус Хайатыгар, доду Эльбруһугар дабайбыт уопуттаах экстремал-туристар. Биһиги бары олоххо араас көрүүлээх, идэлээх да буолларбыт, интэриэспит биир буолан, уопсай тылы булан, сырыыбытыгар олус табылынныбыт.
Евдокия Егорова