Ситиһиилээх спортсмен буола үүнүү үгүс сыраны-сылбаны, дьулууру-сатабылы эрэйэр. Кыайыы өрөгөйүн билии чэпчэкитэ суохтук ситиһиллэр.
Соторутааҕыта Дьокуускайга СӨ норуот хаһаайыстыбатын үтүөлээх үлэһитин Виктор Ефимов кэриэһигэр хотугу многоборьеҕа Дальнай Востоктааҕы, Сибиирдээҕи, Урааллааҕы уонна Хотугулуу-Илиҥҥи федеральнай уокуруктар чөмпүйэнээттэрэ ыытылынна.
Бу Арассыыйа таһымнаах күрэхтэһиигэ биһиги биир дойдулаахпыт, Хотугу многоборьеҕа РФ уонна Саха сирин успуордун маастара Георгий Софронов 1020 наартаны ыстанан, Саха сирин рекордун, тус бэйэтин рекордун тупсарда. Кини былырыын баччаҕа 1010 наартаны ыстаммыта. Ону тэҥэ бу күрэхтэһиигэ Томтортон Андрей Кондаков (тириэньэр Н.Н. Софронов) аркаан быраҕыытыгар 16-17 саастаах юниордарга 2-с бириистээх миэстэни ылары ситистэ.
Георгий Софронов билигин Хотугулуу-Илиҥҥи федеральнай университет Физическэй култуура уонна успуорт институтун 2-с кууруһун устудьуона. Олоххо көхтөөх эдэр киһи, көстөрүн курдук, дьарыгын үөрэҕин кытта дьүөрэлээн, спортивнай күрэхтэһиилэргэ тиһигин быспакка кыттар.
— Бу турнирга бэйэм урукку рекордпун тупсарбыппыттан олус үөрэбин. Ити курдук инникигэ сайдыы баар буолуохтаах. Киһи сайыннаҕына, көрдөрүүтэ тупсан истэҕинэ дуоһуйууну ылар, дьикти, туспа иэйии үөскүүр. Ханнык да эйгэҕэ ситиһии бэйэтинэн тиийэн кэлбэт. Ол туһугар элбэхтик үлэлиэххэ, дьарыктаныахха, туруулаһыахха наада. Ону таһынан аттыгар эйиигин өйүүр, өйдүүр дьон бааллара олус кынаттыыр, көмөлөһөр, күүскэр күүс эбэр. Киһи уостан хаалбатын туһугар, өйөбүл наада. Онон мин тириэньэрдэрбэр, ийэлээх аҕабар, миэхэ күүс-көмө буолар дьоммор, доҕотторбор махтаныахпын баҕарабын, — диэн санаатын үллэһиннэ устудьуон, спортсмен Георгий Софронов.
Бу туһунан сиһилии “Хотугу сардаҥа” хаһыакка ааҕаарыҥ.
Любовь Кривошапкина