Туймаада хочотугар Үс Хатыҥҥа өрөспүүбүлүкэтээҕи Ыһыах буола турдаҕына Өймөкөөн улууһун түһүлгэтигэр биир дойдулаахтара мустан, Үчүгэй нэһилиэгиттэн төрүттээх, төрөөбүт дойдутун сайдыытыгар улахан кылаатын киллэрбит ытык кырдьаҕас Василий Степанович Винокуровы 80 сааһын туолбут өрөгөйдөөх үбүлүөйүнэн чиэстээтилэр.
Үөрүүлээх түһүлгэҕэ үтүөкэн тыллардаах эҕэрдэ суруктар киирдилэр. Ол курдук, Саха сирин Ил Дархана Айсен Николаев, СӨ Ил Түмэн Бэрэссэдээтэлэ Алексей Еремеев, СӨ Тыа хаһаайыстыбатын миниистирэ Артем Александров, ХИФУ бэрэсидьиэнэ Евгения Михайлова, ЯНИИСХ дириэктэрэ Михаил Черосов Эҕэрдэ суруктарын тэрээһини ыытааччылар дорҕоонноохтук ааҕан иһитиннэрдилэр.
Көрсүһүүгэ Ил Түмэн сүрүн кэмитиэттэрин бэрэссэдээтэллэрин аатыттан дьокутаат Владимир Прокопьев Эҕэрдэ суруктары уонна “Почетный старейшина РС(Я)” диэн бэлиэни тус бэйэтэ кэлэн туттарда, үгүс үтүө тыллары анаата. Халыма-Индигирдээҕи уокуруктан Ил Түмэн дьокутаата Гаврил Алексеев эмиэ тэрээһиҥҥэ тус бэйэтинэн кэлэн кытынна, ытык киһини истиҥник эҕэрдэлээтэ.
Өймөкөөн улууһун баһылыгын э.т. Саргылана Можукова, улуустааҕы Култуура управлениетын начаалынньыга Аксинья Сивцева, Үчүгэй нэһилиэгин баһылыга Семен Аммосов көрсүһүүнү тэрийистилэр, улуус, нэһилиэк аатыттан эҕэрдэ бастыҥын эттилэр.
Эдэр сылгыһыт, Үчүгэй нэһилиэгиттэн Москваҕа диэри атынан айаннаан бүтүн Арассыыйа үрдүнэн аатын дорҕоонноохтук ааттаппыт Дугуйдаан төрөппүттэрэ, “Дьөһөгөй төрдө” бааһынай хаһаайыстыба хаһаайыннара Ирина уонна Семен Винокуровтар тыһы убаһаны бэлэхтииллэрин туһунан туоһу сурук туттаран, Ирина Христофоровна нарын куолаһынан “Өймөкөөн — мин дойдум” диэн ырыанан истиҥник эҕэрдэлээн, Василий Степановиһы улаханнык долгуттулар.
Оттон кэргэннии Маргарита Егоровна уонна Василий Степанович Винокуровтар биир дойдулаахтарыгар истиҥ махтал тылларын этэн туран, улуустааҕы Култуура управлениетын начаалынньыгар Аксинья Сивцеваҕа өр сылларга Өймөкөөн улууһун култууратын сатабыллаахтык салайарын, Тымныы полюһугар өрөспүүбүлүкэтээҕи бастакы Олоҥхо Ыһыаҕын үрдүк таһымнаахтык тэрийсэн ыыппытын учуоттаан, дьиэ кэргэн тус бэйэлэрин бириэмийэлэрин — 100 тыһ. солк. уу харчынан туттардылар. Кинилэр маннык бириэмийэни былырыын Өймөкөөн улууһугар ыытыллыбыт Олоҥхо Ыһыаҕар РФ үтүөлээх учууталыгар, кыраайы үөрэтээччи, төрөөбүт дойдутун патриотугар Мария Поликарповна Бояроваҕа анаабыттара.
Көрсүһүүнү үрдүк таһымнаахтык СӨ култууратын үтүөлээх үлэһитэ, араадьыйа суруналыыһа Альбина Тарабукина салайан ыытта.
Ытык дьон Винокуровтар Дьокуускайга олохсуйбут Өймөкөөн улууһун дьонун түмсүүтүн салайааччытыгар Анна Атастыроваҕа сүүрэн-көтөн, биир дойдулаахтарын мунньан бырааһынньыгы тэрийбитигэр дириҥ махталларын биллэрдилэр.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина