Соторутааҕыта Бүлүү улууһун Тыымпы нэһилиэгэр «Сырдык Уулаах» сайылыкка ыытыллыбыт киэҥ далааһыннаах өрөспүүбүлүкэтээҕи тэрээһиҥҥэ Өймөкөөнтөн бэтэринээр идэлээх племенной дьыала зоотехник-селекционера Владимир Атласов ситиһиилээхтик кытынна. Ол курдук кини таба иитиитин салаатыгар 1-кы бочуоттаах миэстэҕэ тиксэн, 65 000 солк. суумалаах сэртипикээтинэн, мүһэнэн наҕараадаланна.
— Күрэххэ «Үчүгэй» ААУо аатыттан кытынным. Тэрилтэ дириэктэринээн Павел Сивцевтыын иккиэн бара сырыттыбыт. Күрэхтэһии икки хайысханан ыытыллыбыта. Бэрт элбэх улуустан кыттааччылар кэлбиттэрэ, — диэн кэпсээтэ Владимир.
Тэрээһин олус үчүгэйдик, үрдүк таһымҥа ааста. Кыттааччылар саастара, үлэлиир ыстаастара араас гынан баран, эдэрдэр элбэхтэр эбит. Бу күрэххэ кыттан элбэҕи биллим-көрдүм, үлэбэр туһалааҕы ылынным, атын улуус ыччаттарын кытта билистим.
Владимир тоҕо бу идэни чуолаан талбытын туһунан ыйытыыга маннык хоруйдаата:
- Эн тоҕо бу идэни чуолаан талбыккыный?», — диэн ыйыппыппар маннык хоруйдаата: «Мин олох оҕо эрдэхпиттэн тыа хаһаайыстыбатын үлэтин барытын билэ-көрө сылдьыбыт киһибин. Бу хайысха өнүйэрин, сайдарын туһугар эдэр ыччат, биһиги, күүспүт-уохпут, билиибит-көрүүбүт олус наада. Онон үөлээннээхтэрбин тыа хаһаайыстыбатыгар бэйэлэрин кылааттарын киллэрэллэригэр, үлэлииллэригэр ыҥырыам этэ.
Владимиры бу улахан таһымнаах өрөспүүбүлүкэтээҕи күрэххэ дьоһуннаах кыайыытынан эҕэрдэлиибит. Өссө да ситиһии сиэттистин, табыллыы тайаннын. Өрүү дьон махтала, үтүө санаата кинини арыаллыы сырыттын.
Бу туһунан сиһилии “Хотугу сардаҥа” хаһыакка ааҕыҥ.
Тамара Винокурова,
биһиги общ. корр.,
Өймөкөөн