Бу күннэргэ Томтор нэһилиэгин олохтоохторугар улахан үөрүүлээх сонун кэллэ – дойду үрдүнэн куйаар ситиминэн ыытыллыбыт 14.gorodsreda.ru куоластааһын куонкуруһугар кыайан, «Куораттыы эйгэни тупсарыы» федеральнай бырайыак, «Олорор дьиэ уонна куораттыы эйгэ» национальнай бырайыак чэрчилэринэн С.В. Обручев аатынан уулусса бульварын саҥардыы кыайыылааҕынан таҕыста.
Барыта 67 бырайыак киирбититтэн кыайыылааҕынан 32 эбийиэк талыллыбыт. Тымныы полюһунан аатырар Өймөкөөҥҥө Сергей Обручев аатын үрдүктук туталлар, киэн тутталлар.
2016 с. Сергей Обручев 125 сылыгар кини аатынан искибиэр аһыллан, чинчийээччи пааматынньыга (бюст) оҥоһуллан турбута. Томтор нэһилиэгин олохтоохторо аны бары көхтөөхтүк куоластааһын куонкуруһугар кыттан, Обручев аатынан уулусса бульварын оҥоһуутугар федеральнай үбүлээһин көрүллүүтүн ситистилэр.
Бульвары тупсаран оҥоруу туһунан нэһилиэк баһылыга Алексей Винокуровы кытта кэпсэттибит.
— Томтор киин уулуссатыгар нэһилиэк киэн туттар эбийиэктэрэ тураллар – меценат-атыыһыт Ньукулай Кырбаһааҥкын пааматынньыга, Кыайыы мемориала уонна саха атыгар пааматынньык. Бүгүҥҥү күҥҥэ Обручев уулуссата кумахтаах буорунан бүрүллэн турар, ханан да тротуар суох, олоро түһэн сынньанар сирэ суох. Баһылыгынан быыбарданан үлэбин саҕалыырбар бу бульвары саҥардан оҥорорго ылыспытым. 300 тыһыынча солкуобайга анал бырайыак оҥотторбуппут. Олоҥхо Ыһыаҕын эбийиэктэригэр киллэттэрээри гыммыппытын, үбүлээһин олох кэмчи диэн, испииһэккэ кыайан киирбэтэҕэ. Онон сыл аайы олохтоох бүддьүөттэн харчы тыыран, сыыйа олоххо киллэрэн иһиэхпит диэн былааннаабыппыт. Ол үлэбит төһө өр барыа биллибэт буоллаҕа. Хата, бу куоластааһын куонкуруһугар кыайан, уулуссабыт бульварын саҥардыыга эһиилгиттэн федеральнай үп көрүллэн, киин уулуссабыт биллэ тупсуоҕа.
Кэлиҥҥи сылларга Томтор нэһилиэгэ киһи билбэт гына тупсан эрэр. Сотору олохтоох көҕүлээһининэн кыайбыт эбийиэкпитин – уу турбатын холбуохпут. Саҥа хочуолунайбыт тутуллан үлэҕэ киирбитэ. Аны бу күннэргэ Куйдуһун муостатын олоххо киллэриэхпит. Онон, түгэнинэн туһанан, олоххо өрүү көхтөөх биир дойдулаахтарбар истиҥ махталбын тиэрдэбин. Туохха бырытыгар өрүү бу маннык түмсүүлээхтик ылсан, төрөөбүт Томторбутун тупсара, киэргэтэ туруохха. Биһигини кытта өрүү ситиһии сиэттистин!
Өймөкөөн улууһун дьаһалтатын пресс-сулууспата