Эдэр ыал – олох сайдар кэскилэ

Өймөкөөн улууһун Томтор нэһилиэгин олохтоохторун биир бастыҥ ыалынан Сивцевтэр дьиэ кэргэннэрэ буолар.

Ыал маанылаах хаһаайката Элеонора Аммосова Н.М. Заболоцкай-Чысхаан аатынан Томтор орто оскуолатыгар маҥнайгы кылаас оҕолорун үөрэтэр. Эдэр учуутал олоҕор үҥкүү, ырыа аргыстаах сылдьар.  Ону тэҥэ успуорт араас көрүҥнэринэн утумнаахтык дьарыктанар: теннис, волейбол, сүүрүү.

Кинилэр Александр Сивцевтыын дьылҕаларын холбоон, быйыл бэһис сылларын ыал буолан олороллор. Аҕа баһылык Александр авиалесоохранаҕа үлэлиир, ону таһынан база тэринэн сыспай сиэллээҕи иитэр. Итини тэҥэ үлэһит бэрдэ эдэр аҕа Өймөкөөн – Дьокуускай хайысхаларынан дьону таһан суоппардыыр.

Дьиэ кэргэн икки кыыс оҕолоохтор, улаханнара Мичийэ 4 саастаах, кыралара Сайаана – үһэ.

— Былырыын Томтор сиригэр-уотугар ыытыллыбыт өрөспүүбүлүкэтээҕи Олоҥхо Ыһыаҕар аҕабыт Александр ат сүүрдүүтүгэр кыттыбыта. Онно 2400 м дистанцияҕа «Баат» диэн сүүрүк атынан 2-с үктэл кыайыылааҕа буолан, 120 тыһ. суумалаах сэртипикээтинэн наҕаарадаламмыта. Уонна өссө «Мамлюк» диэн атынан 1600 м сүүрдэн, 3-с миэстэҕэ тиксэн, эмиэ итинник харчылаах сэртипикээти туппута. Аммосовтар, Вензеллэр уонна бары аймахтарын ааттарыттан 150 тыһ. суумалаах сэртипикээт — аҕатын туйаҕын хатаран, сыспай сиэллээҕи сайыннарыа диэн эрэллэрин биллэрэн туран, эдэр киһиэхэ анаабыттара. Кини ат сүүрдэрин олус сөбүлүүр, – диэн кэпсиир ыал ийэтэ Элеонора.

— Биһиги дьиэ кэргэн иллэҥ кэммитигэр бары бииргэ ас астаан, киинэ көрөн, айылҕаҕа тахсан дуоһуйа сынньанан киирэр үгэстээхпит. Кыргыттарбыт билиҥҥиттэн ырыаҕа, үҥкүүгэ дьарыктаналларын хааччыйабыт. Араас таһымнаах куонкурустарга, тэрээһиннэргэ кыах баарынан кыттыннарарга дьулуһабыт, – диэн үллэстэр Элеонора.

Бу туһунан сиһилии «Хотугу сардаҥа» хаһыакка ааҕын.

Евдокия Егорова