Ханнык баҕарар киһи маҥнайгы учууталын үйэтин-сааһын тухары умнубат, киниэхэ тыл киэнэ маанылааҕын анаан, өрүү сылаастык ахтар-саныыр.
Тоҕо диэтэххэ, бу сүдү киһи эн аналлаах айаныҥ аартыгын арыйар, туһааннаах суолуҥ төрдүн булларар.
Быйыл Н.М. Заболоцкай-Чысхаан аатынан Томтор орто оскуолатыгар 4 саҥа эдэр учуутал үлэтин саҕалаата. Кинилэртэн биирдэстэринэн Элеонора Сивцева буолар.
Элеонора Андреевна — алын кылаас учуутала, Сордоҥноох нэһилиэгиттэн төрүттээх. Кини Томтор орто оскуолатыгар 2022-2023 үөрэх дьылыгар бастаан тьюторынан (оҕо интэриэһин чинчийэн, кини сайдыытыгар көмөлөһөр исписэлиис) үлэтин саҕалаабыта.
Оттон быйылгы үөрэх дьылыттан киниэхэ оскуола боруогун саҥа атыллаабыт 17 кырачааннарга кылаас салайааччыта буолары эрэннилэр.
Э.А. Сивцева бастакы чуораанын туһунан санаатын маннык үллэстэр:
— Учуутал быһыытынан күүппүт, долгуйбут бастакы чуорааным бэрт түргэнник элэҥнээн ааста. Маҥнайгы кылааска уопсайа 17 оҕо киирдэ: 8 уол, 7 кыыс. Бастакы уруокпун долгуйан туран ыыттым. Хата, оҕолорум толлубакка, уруокпар олус көхтөөхтүк кытыннылар. Биир идэлээхтэрбэр саҥа үөрэх дьылыгар кытаанах доруобуйаны, саҥа сүүрээннэри, тулууру, айымньылаах үлэни уонна өйдөөх-төйдөөх оҕолору баҕарыам этэ, — диэтэ эдэр учуутал Элеонора Сивцева.
Бу туһунан сиһилии “Хотугу сардаҥа” хаһыакка ааҕыҥ.
Ольга Скрыбыкина