Эбии үөрэхтээһин оҕо айар дьоҕура сайдарыгар көмөлөһөр

Быйыл дойдуга биллэриллибит Педагог уонна уhуйааччы сыла түмүктэнэрэ аҕыйах кэм хаалла.

Бу сыл устата педагогтары өйүүр, кинилэр уустук уонна сыралаах үлэлэрин сыаналыырга туһуламмыт үгүс көдьүүстээх дьаһал ылылынна. Ол иһигэр эдэр, саҥа уопутуран эрэр уһуйааччылары эмиэ.

Алевтина Дмитриева Үчүгэй орто оскуолатыгар эбии үөрэхтээһин педагогунан үлэлиир.

Алевтина Михайловна 2008 с. «Дьокуускайдааҕы иис уонна дизайн» колледжын бүтэрбитэ. Онтон оскуолаҕа оҕолору кытта үлэлиир кини идэтэ буолуоҕун өйдөөн, М.К. Аммосов аатынан Хотугулуу-Илиҥҥи Федеральнай университетка кэтэхтэн үөрэнэ киирбитэ. А.М. Дмитриева эбии үөрэхтээһин педагогунан номнуо 5 сыл үлэлээтэ, уопсай ыстааһа — 14 сыл.

Кини бу кэм устата дьарыктыыр оҕолорун ураты талааннарын арыйарга дьулуһар, оҕо кистэлэҥ дьоҕурун сайыннарарга бары күүһүн-уоҕун уурар. Ол түмүгэр Алевтина Михайловна иитиллээччилэрэ улуустааҕы, өрөспүүбүлүкэтээҕи уонна бүтүн Арассыыйатааҕы куонкурус кыттыылаахтара.

Талааннаах учуутал салайыытынан бу оскуолаҕа «Дьулуур» диэн оҕо айар дьоҕурун холбоһуга ситиһиилээхтик үлэлиир-хамсыыр. Педагог онуоха дьарыктанар оҕо үөрэҕин таһынан эбии дьарыктаах буоларын туһугар кыһаллар.

А.М. Дмитриева оҕо толлугаһа суох буоларыгар, санаатын сааһылаан этэригэр, толкуйдуур, туохха барытыгар айымньылаахтык сыһыаннаһа улаатарыгар үгүс сыратын биэрэр. «Дьулуур» оҕо түмсүүтүн ситиһиилээхтик салайар, оҕо тылын-өһүн байытар, оҥорон көрөр дьоҕурун сайыннарар. Алевтина Михайловна оҕолоругар саҥаттан-саҥа сорудахтары, дьарыктары толкуйдаан, киэҥ билиигэ сирдиир. Кини театрализованнай инсценировкаларга, уус-уран ааҕыыларга кытыннаран, аахпыт айымньынан уруһуйдатан, оҕо интэриэһин тардар үлэлэри сатабыллаахтык тэрийэр. Үөрэнээччилэр тэтимнээхтик үлэлииргэ үөрэнэн, түргэнник толкуйдуур, эппиэтинэстээх буола улааталлар.

Маннык утумнаахтык үлэлиир уһуйааччы төрөппүттэри, учууталлары биир сыалга түмэ тардар дьоҕура туохха да кэмнэммэт үтүө холобурунан буолар.

Бу туһунан сиһилии “Хотугу сардаҥа” хаһыакка ааҕаарыҥ.

Аграфена Аммосова, биһиги общ.корр., Үчүгэй

Читайте дальше