Дугуйдаан Винокуров: «Владимир Путины мындыр өйдөөх бэлиитигинэн аан дойду барыта билинэр»

Саха атын аан дойдуга аатырдыбыт удьуор сылгыһыт, экстремал айанньыт, аны билигин бэйэтин хапсаҕайга холонон көрөр Дугуйдаан Винокуров саха атын тургутуутун уонна «Бэрэсидьиэни кытта бииргэ» диэн баннерга тахсыбытын туһунан кэпсэттибит.

— Саха атын тургутар санаалар хаһан эйиэхэ кэлбиттэрэй?

— Саха аттарын тургутар санаа миэхэ хас да сыллааҕыта киирбитэ. Икки сыл аттаах туризмынан дьарыктаммытым. Англия, Австралия, Саҥа Зеландия, Франция курдук дойдулартан сылгынан дьарыктанар туристар кэлэн көрөн, саха атыттан саллаллар этэ. Сахалар наһаа тулуурдаах туспа боруода сылгылаах эбиккит диэн сөҕөллөрө. Интэриниэккэ көрдөххө, бэрт аҕыйах информация баар. Ол иһин саха сылгытын кыайыыта, ситиһиитэ бигэргэннин, аан дойдуга элбэх киһи биллин диэн маннык айаҥҥа туруммуппут. Саха ата тулуурдааҕын, күүстээҕин дакаастаабыппыт.

— Айан кэнниттэн туох түмүктэри оҥоһуннуҥ?

— Айан кэннэ киһи олоҕу, инникитин көрөрө олох атын буолар. Арассыыйа 17 эрэгийиэнин ааһан, араас дьоннуун алтыһан аастаҕым. Дьону кытта алтыһан, бэйэҥ санааҕын этэ үөрэнэн, олоҕу көрүүҥ тосту уларыйар. Бу иннинэ ыраах тэлэһийбэтэх, Саха сириттэн тахсыбатах киһибин.

Атын эригийиэннэргэ сылгыны төhө иитэллэр эбитий?

— Сылгыны иитиигэ барыларын баһыйан иһэбит дии саныыбын. Сылгыбыт элбэх. Биһиги култуурабыт сылгыны кытары ситимнээх, онтубутун тутан хаалбыппыт. Атын омуктарга ону кэпсииртэн да киэн туттаҕын. 180 тыһыынча сылгы баар, төбөтө аҕыйаабат, элбии турар диэтэхпинэ, сөҕөллөр. Сылгыбыт симэлийдэҕинэ, сахалар норуот быһыытынан сүтэбит дии саныыбын.

— «Бэрэсидьиэни кытта бииргэ» диэн баннерга тахсыбытыҥ туһунан санааҥ?

— Владимир Путины эппиэтинэстээх, аптарытыаттаах уонна мындыр өйдөөх бэлиитигинэн аан дойду барыта билинэр. Кини дойдуну салайбыт сылларын тухары бэйэтин тылыгар турар киһи буоларын дакаастаата.

Кэлэр кэскилбит, үксүүрбүт, сайдыыбыт кинини кытта ыга сибээстээх дии саныыбын.

Биһиги корр.

Читайте дальше