Дьокуускайга «Триумф» спорткомплекска ыытыллыбыт бүтүн Арассыыйатааҕы “Хаҥалас хапсаҕайа» Гран-при турнирыгар 472 бөҕөс, ол иһигэр Өймөкөөн улууһуттан 15 эдэр ыччат уонна успуорт бэтэрээнэ Василий Винокуров кыттыбыттара.
Күрэхтэһии солбуллубат комментатора Александр Васильев уутугар-хаарыгар киирэн, хас биирдии хапсыһыыны уустаан-ураннаан сырдаппыта улахан интэриэһи үөскэппитэ.
Комментатор биһиги уолбутун, Дугуйдаан Винокуровы, маннык биллэрбитэ:
“Дьэ, доҕоттоор, билигин “С” көбүөргэ улахан сэргэхсийии тахсара күүтүллэр. Тоҕо диэтэххэ, көбүөргэ ыҥырыллар аар-саарга аатырбыт айанньыт, Өймөкөөн өрүөлэ Дугуйдаан Винокуров!».
Кини ити этиитин мустубут дьон сэҥээрэ түһэн, дохсун ытыс тыаһынан көрүстүлэр.
«Хайыы, ити били Москубаҕа атынан айаннаан тиийбит уол дии», — диэн кэпсэтэллэрин үөрэ иһиттим.
Дугуйдааны мин Өксөкүлээх Өлөксөй аатынан норуоттар доҕордоһууларын дьиэтигэр ыҥыран көрүстүм. Бу манна «Уус Алдан уран уустарын түһүлгэтэ» диэн ааттаах быыстапка үлэлии турар кэмэ этэ. Киирээти кытта уҥа диэки Дугуйдаан баар хартыыната киһи хараҕар тута быраҕыллар.
Быыстапка үөрүүлээх быһыыга-майгыга арыллыытыгар Дугуйдаан бочуоттаах ыалдьыт быһыытынан ыҥырыллан сылдьыбыт эбит. Бу үлэни ааспыт сылга Өймөкөөн улууһугар ыытыллыбыт Олоҥхо Ыһыаҕар бэрт элбэх киһи көрөн сөҕөн-махтайан, бэркэ диэн биһирээн хараҕын сымнатан турардаах.
«Алгыстаах айан аартыгар» диэн олус кэрэ, сиэдэрэй паннону «Мүрү оһуора» диэн түмсүү иистэнньэҥнэрэ оҥорбуттар. Салайааччы — Екатерина Бочкарева.
Дугуйдаантан бу үлэ туһунан санаатын ыйыппыппар сэмэйдик: «Үчүгэй. Хаартыскаттан үүт-үкчү оҥорбуттар», — диэтэ. Мин киниттэн кэлиҥҥи кэмҥэ дьарыгын, үлэтин уонна инники былаанын туһунан туоһуластым. Онуоха уол маннык кэпсээтэ:
«Билигин наар успуордунан дьарыктанар буоллум. «Триумф” комплекска нэдиэлэҕэ үстэ Прокопий Петров салалтатынан “Түргэн” кулуупка дьарыктанабын. Эрчиллибитим сыл аҥаара буолла. Уопсайа төрдүс күрэхтэһиибэр кытынным.
Соторутааҕыта Уус-Ньараҕа улуустааҕы ыччат Баала буолан ааспыта. Онно миэхэ «Өймөкөөн улууһун киэн туттуута” диэн номинацияны анаан, бэлиэ статуэтка, сертификат наҕараада биэрбиттэр этэ.
Киин куоракка сир, учаастак ылан сылгыга, саха атыгар аналлаах түмэл арыйан үлэлэтиэхпин баҕарабын. Оҕону, эдэр ыччаты, дьону-сэргэни сылгыга, акка сыһыарыахха, олох чугаһатыахха наада этэ.
Өссө биир айаны, бу сырыыга тас дойдуга, тэрийэр киһи диэн ыра санаалаахпын. Билигин ол туһунан тугу да чопчу этэр кыаҕым суох, — диэн кэпсээтэ Дугуйдаан Винокуров.
Сиһилии “Хотугу сардаҥа” хаһыакка ааҕыҥ.
Тамара Винокурова, биһиги общ.корр.