Дойду бэрэсидьиэнэ Владимир Путин көҕүлээбит “Доруобуйа харыстабыла” национальнай бырайыак чэрчитинэн, нэһилиэнньэ ис туругун, чэгиэн буолуутун ситиһэр сыалтан өрөспүүбүлүкэбитигэр Доруобуйа уон сыла биллэриллэн турар.
Өймөкөөн улууһун доруобуйа харыстабылын ситимигэр киин балыыһа стационара, поликлиника, 6 врачебнай амбулатория уонна биир биэлсэр-акушер пууна киирсэллэр. Сыл аайы улуустааҕы киин балыыһа салалтата мэдиссиинэ саҥа тэриллэринэн, миэбэлинэн, оргтехниканан доруобуйа харыстабылын тэрилтэлэрин хааччыйарга туһуламмыт үлэни былааннаахтык тэрийэр. Маныаха спонсордар көмөлөрө эмиэ улахан оруолу ылар.
2022 сылга Томтор сэлиэнньэтигэр “Доруобуйа” национальнай бырайыак, “Доруобуйа харыстабылын бастакы сүһүөх тэрилтэлэрин аныгылыы уларытан тутуу” өрөспүүбүлүкэтээҕи бырагырааманан врачебнай амбулатория тутуллан үлэҕэ киирбитэ. Амбулатория Томтор олохтоохторун таһынан, өссө чугастааҕы нэһилиэктэри хааччыйар. 200 кв м иэннээх саҥа үлэҕэ киирбит дьиэ бары аныгы ирдэбилгэ эппиэттиир тэриллээх.
В.В. Путин Федеральнай Мунньахха быйылгы туһаайыытыгар “Кэлэр алта сылга доруобуйа харыстабылын эбийиэктэрин тутуутугар, өрөмүөнүгэр, тустаах тэрилинэн хааччыйыыга биир триллион кэриҥэ солкуобай көрүллүө” диэн тоһоҕолоон бэлиэтээбитэ.
2023 с. СӨ Доруобуйа харыстабылын министиэристибэтэ улуустааҕы киин балыыһаҕа уонна Томтордооҕу врачебнай амбулаторияҕа УАЗ массыыналары биэрбитэ кэрэхсэбиллээх.
Улууска каадыр тиийбэт боппуруоһа сытыытык турар. Ол эрээри киин балыыһа салалтата бу хайысханан эмчиттэр идэлээх таһымнарын үрдэтиигэ, саҥа кэлэр исписэлиистэргэ үлэлиир, олорор усулуобуйаны тэрийиигэ тустаах үлэни тэрийэргэ кыһаллар.
Бэрэсидьиэн Владимир Путин соторутааҕыта Федеральнай Мунньахха туһаайыытыгар “Каадырдар” национальнай бырайыагы олохтообута. Онон бу сытыы боппуруос инникитин сөптөөхтүк быһаарылларыгар олук уурулунна.
Любовь Кривошапкина