Бүгүн Ис дьыала уорганын үлэһитин күнэ бэлиэтэнэр. Биһиги корр. идэлээх бырааһынньыктарынан сибээстээн, Өймөкөөн улууһунааҕы Ис Дьыала отделын начаалынньыгын солбуйааччы, тус састаабы кытта үлэлиир бөлөх салайааччыта, полиция капитана Александр Неустроевтыын кэпсэттэ.
— Отделбыт састаабын 35 бырыһыана эдэр дьон. Кинилэр бары тустаах ирдэбилгэ сөп түбэһэр, эппиэтинэстээх үлэһиттэр. Бэрээдэги араҥаччылааччы идэтин талбыттар хас биирдиибит түргэн уонна быһаарыылаах туттунуутуттан, биир санаанан салайтаран түмсүүлээхтик үлэлиирбититтэн киһи олоҕо тутулуктааҕын өйдүүбүт. Ол иһин хас биирдии үлэһит санаатынан, дьулуурунан, дьаныарынан дьон-норуот көмүскэлигэр, судаарыстыба бары эйгэтэ харгыһа суох сайдарыгар көмө-тирэх буолар соруктаах.
Полиция үлэһитэ биир үйэттэн ордук кэм устата уопсастыбаннай бэрээдэк туһугар, хас биирдии олохтооххо куттала суох усулуобуйаны тэрийии туһугар үлэлэһэн кэллэ. Ол курдук биһиги сорукпут — буруйу оҥорууну, терроризмы, куорҕаллааһыны, арыгылааһыны, наркоманияны утары хас күн аайы охсуһан, куттала суох тулалыыр эйгэни хааччыйыы.
Бу күннээххэ отделга 11 вакантнай миэстэ баар. Тырааныспарынан толору хааччыллан турабыт.Үлэбит усулуобуйата, материальнай-техническэй базабыт аныгы кэм ирдэбилигэр толору эппиэттиир. Ону кытта сотрудниктартан ирдэбил эмиэ күүһүрэр.
Бары ити курдук биир сыаллаах-соруктаах үлэлиир буолан, көрдөрүүбүт сыл аайы тупсан иһэр диэн бэлиэтиэм этэ.
2023 сылга 10 ый түмүгүнэн буруйу оҥоруу уопсай ахсаана 108 тэҥнэһэр. Ааспыт сыл бу кэмигэр 104 этэ. Улууска быйыл 13 суол быһылаана таҕыста, ааспыт сылга — 15.
Өймөкөөҥҥө көмүһү хостооһун, бырамыысалыннас күүскэ сайдыбыт буолан, бэрээдэги араҥаччылыыр дьоҥҥо эппиэтинэс хас даҕаны бүк үрдүк. Өймөкөөн куустатыгар баар нэһилиэктэргэ бэрээдэги икки участковай көрөр-истэр. Кинилэр Томтор нэһилиэгэр кииннэнэн үлэлииллэр-хамсыыллар. Оттон Аартык бөһүөлэгэр уонна Төрүт нэһилиэгэр участковай Уус-Ньараттан сылдьан үлэлиир, онон нэһилиэктэр бары хабыллан олороллор.
Биһиги отделбыт оройуоҥҥа ыытыллар тэрээһиннэргэ куруутун көхтөөхтүк кыттар. Билигин Уус-Ньараҕа бара турар тэрилтэлэр икки ардыларынааҕы спартакиада түмүгүнэн билиҥҥитэ 1-кы миэстэҕэ иһэбит, — диэн кэпсээтэ ис дьыала салаатын эппиэттээх үлэһитэ Александр Неустроев.
Ольга СКРЫБЫКИНА