2023 сыл түмүктэнэрэ чугаһаан эрэр. Үлэ-хамнас түмүгэ таһаарыллар, туох ситиһиллибитэ бэлиэтэнэр, туох кыайтарбатаҕа ырытыллар, үүнэр сылга саҥа соруктар туруоруллар кэмнэрэ үүннэ.
Сордоҥноох нэһилиэгин аҕа баһылыга Альберт Вензель ааһан эрэр сыл түмүктэрин туһунан маннык билиһиннэрэр:
- Быйыл Сордоҥноох сэлиэнньэтигэр ыраастаныы үлэтэ күүстээхтик барда. Нэһилиэкпитигэр субуотунньуктаан бөдөҥ бөҕү-сыыһы хомуйдубут. Ону таһынан халаан уута алдьаппыт суолун чөлүгэр түһэрии үлэтэ, оҕо спортивнай былаһааккатын өрөмүөнэ ыытылынна. Сайыҥҥы уу ситимин тардыытын үлэтэ 40% оҥоһулунна. Баһаары сэрэтэр үлэ чэрчитинэн, быйыл минерализованнай балаһа оҥоруутугар ураты болҕомто уурулунна.
Нэһилиэнньэҕэ чэпчэки сыаналаах тутуу матырыйаалын киин куораттан тастардыбыт. Онуоха 3 рейс оҥоһулунна. Өссө сүрүн бородууктаҕа нэһилиэнньэттэн сайаапка хомуйан, аһы-үөлү босхо тиэйэн аҕаллыбыт. Биир сүрүн үлэбит — хаарбах дьиэлэр докумуоннарын уонна грязолечебница дьиэтин докумуонун оҥотторуу буолла. Бу хайысханан үлэ билигин даҕаны салҕанан бара турар.
Ааһан эрэр дьыл Өймөкөөн дьонугар-сэргэтигэр ураты суолталаах сылынан буолбута биллэр. Тымныы полюһугар, хотугу сиргэ аан бастакытын ыытыллыбыт өрөспүүбүлүкэтээҕи Олоҥхо Ыһыаҕа үрдүк таһымнаахтык ааста. Олоҥхо Ыһыаҕар нэһилиэк олохтоохторо бары биир сомоҕо буолан, кыралыын-улаханныын 100% ситиһиилээхтик кытынныбыт.
Куйдуһун муостата алдьанан, нэһилиэккэ ас-таҥас, эмп-том, оттук тиэрдиллэригэр үгүс ыарахаттары көрсө сырыттыбыт. Ол да буоллар, бэйэ-бэйэни өйдөөһүн уонна өйөөһүн баар буолан, бу уустук кэми этэҥҥэ аастыбыт.
Анал байыаннай дьайыыга сылдьаааччылары өйөөн, быһа холоон 100-н тахса киилэлээх аһы-таҥаһы хомуйан, Хабаровскай куоракка госпитальга ыыттыбыт. Бу аахсыйабытын нэһилиэк дьоно биир киһи курдук өйөөн көхтөөхтүк кытынна.
— Төһө даҕаны олохпут тутула ыараатар, Сордоҥноох нэһилиэгин дьоно-сэргэтэ биир сиргэ олорон хаалбакка кыахтара баарынан үлэлээн-хамнаан, туруулаһан туран, ыарахаттартан чаҕыйбакка олорон кэллибит. Түгэнинэн туһанан, Сордоҥноох нэһилиэгин хас биирдии олохтооҕор улахан махталбын тиэрдэбин, — диэтэ аҕа баһылык А.Н. Вензель.
Ольга Скрыбыкина