Саха сиригэр олоҥхо декадатын чэрчитинэн сэтинньи 10 күнүттэн саҕалаан араас хабааннаах тэрээһиннэр ыытылла тураллар. Быйыл тэриллибит олоҥхо декадата ордук чуолаан кэлэр көлүөнэҕэ анаммыт. Ол курдук, хас да улууска эдэр дьоҥҥо аналлаах тэрээһиннэр өссө да ыытыллыахтаахтар. Санатар эбит буолахха, бу сылга олоҥхо декадата тохсус төгүлүн ыытыллар.
СӨ Култуураҕа уонна духуобунай сайдыыга миниистирэ Афанасий Ноев өрөспүүбүлүкэ үрдүнэн уопсайа 60-тан тахса улахан тэрээһин ыытылла турарын иһитиннэрдэ:
«Нэһилиэктэринэн, улуус кииннэринэн ыытыллар тэрээһиннэр олус элбэхтэр. Онон быйылгы олоҥхо ыйа оҕолорго ананан, ордук болҕомто ууруллан, ыытылла турар. Холобур, сэтинньи 10 чыыһылатыгар Мэҥэ Хаҥалас киинигэр Аллараа Бэстээххэ “Олоҥхо оҕолоро” диэн тэрээһинтэн саҕалаан, оттон Амма Эмис нэһилиэгэр ыччакка аналлаах тэрээһиннэр буолан аастылар. Итинник салҕанан бара туруоҕа. Дьокуускай куорат оскуолаларыгар эмиэ араас тэрээһиннэр ыытыллаллар».
СӨ Бырабыыталыстыбатын Бэрэссэдээтэлин солбуйааччы Сергей Местников олоҥхо декадатынан биир кэлим бырагыраамата оҥоһуллан, чочуйуллан бигэргэтиллибитин туһунан кэпсээтэ.
«Бу бырагыраама ураты суолтата диэн аҥардас култуура эрэ эйгэтигэр буолбакка, үөрэх эйгэтигэр киллэрии буолар. Ол эбэтэр оскуола уонна уһуйаан оҕолоругар, орто уонна үрдүк үөрэх кыһаларыгар олоҥхо декадатын чэрчитинэн тэрээһиннэри олоххо киллэрии. Оччоҕо олоҥхобут ситимэ быстыбакка салҕанан, үүнэр көлүөнэҕэ баран иһиэ этэ”, – диэн кини эттэ.
Маны тэҥэ Сергей Местников олоҥхо энциклопедиятын туһунан сэһэргээтэ:
“Бу энциклопедия туһунан толкуй былырыыҥҥы көрсүһүүгэ олоҥхо ассоцияциятын, ХИФУ иһинэн үлэлиир үнүстүтүүт уонна активистар көҕүлээһиннэринэн киирбитэ. Ону биһиги биһирии истэммит, олус интэриэһиргээммит, хайаан даҕаны маннык үлэ тахсыахтаах диэн быһаарыныы ылыммыппыт. Ол үлэбит билигин номнуо ортолоон эрэр. Эһиил энциклопедиябыт күн сирин көрүө диэн эрэллээхпит”.
Олоҥхо тыйаатырын дириэктэрэ Мария Турантаева олоҥхо декадатын устун өссө туох күүтүллэрин кэпсээтэ. Кини этэринэн, бу ый бүтүөр дылы төгүрүччү олоҥхо тэрээһиннэрэ ыытыллыахтаахтар. Оттон чуолаан тыйаатыр маныаха анаан испэктээктэри бэлэмнээбит:
“Үгэс быһыытынан Олоҥхо тыйаатыра испэктээктэри бэлэмнээтэ. Быйыл олоҥхобут декадатын тохсус төгүлүн ыытабыт. Эһиил кэмниэ кэнэҕэс онус сыла буолар, онон эмиэ элбэх интэриэһинэй тэрээһин баар буолуо. Сылтан сыл олоҥхобут темата кэҥээтэр кэҥээн, халыҥаан иһэр. Хас биирдии дьиэ кэргэҥҥэ, уһуйааннарга, оскуолаларга маннык тэнийэн иһэриттэн биһиги олус үөрэбит”.
Олоҥхо декадата Олоҥхо күнүгэр анаан сылын ахсын бэлиэтэнэр. Олоҥхо сайдарын туһугар элбэх саҥа сүүрээн киллэриллэр, сылын ахсын саҥа тэрээһиннэр, сонун бырайыактар эбиллэн иһэллэр.