Бу күннэргэ Дьокуускайга олорор Өймөкөөнтөн төрүттээх дьон-сэргэ улуус баһылыгынан саҥа талыллыбыт Александр Оконешниковы кытта көрүстүлэр.
Мустубут дьон Александр Савельевиһы кытта истиҥник-иһирэхтик көрсөн, улуус олохтоохторун итэҕэлин ылбытынан эҕэрдэлээтибит. Эдэр баһылыкка ыарахаттартан чаҕыйбакка, Өймөкөөн улууһун дьонун туһугар таһаарыылаахтык үлэлииригэр-хамсыырыгар баҕа санаабытын тиэртибит.
Александр Оконешников бу күннэргэ СӨ Киин быыбардыыр хамыыһыйатын улуус баһылыга буолбутун туоһулуур докумуону туппутун, муниципальнай тэриллиилэр 5 саҥа баһылыктара Айсен Николаевы кытта көрсүбүттэрин туһунан иһитиннэрдэ. Ил Дархан баһылыктары быыбарга кыайыыларынан эҕэрдэлээн туран, кинилэр этиилэрин истибитин уонна социальнай-экономическай сайдыы сыалын-соругун иһитиннэрбитин туһунан сырдатта. Маны сэргэ А. Оконешников мустубут дьоҥҥо сенатор Сахамин Афанасьевы кытта эмиэ көрсүбүтүн туһунан кэпсээтэ.
Маргарита Винокурова, общ.корр.,
Дьокуускай