Ааспыт нэдиэлэҕэ Томтор нэһилиэгин кырдьаҕастара сайыҥҥы лааҕырбыт чэрчитинэн Өймөкөөммүт биир кэрэ көстүүлээх сиригэр — “Хороту” күөлгэ үс массыынанан баран кэллибит.
Лааҕырбыт салалтата Айталина Иванова уонна кини көмөлөһөөччүтэ Раиса Березкина биһигини олус бэркэ бүөбэйдээн илдьэ сырыттылар.
Суоппардарбыт — Артур Сивцев, Иннокентий Посельскай, Павел Антонов. Турбаза үлэһиттэрэ Гавриил Готовцев, Виктор Скрыбыкин ыалдьыттары үөрэ-көтө көрсөн дьиэлэргэ киллэрэн сынньатан, кутаа уот оттон чэй өрөр түбүгэр түстүлэр. Виктор бэл диэтэр бырдахтартан эмтээн, солото суох сырытта.
Ытык сиргэ тиийэн биһиги сахалыы таҥнан-симэнэн дьикти айылҕалаах, халлааҥҥа харбаһар хайалардаах, долгун ньуурдаах күөл устун оҥочонон уһуннубут. Дойдубут аптаах салгынынан сайа тыынан, астына алтыһан муораҕа сылдьардыы сананныбыт, дуоһуйуохпутугар дылы сынньанныбыт.
Салайааччыларбытыгар, суоппардарбытыгар, база үлэһиттэригэр барҕа махтал буолуохтун, аҕа дьоннор алгыстара эһиэхэ тиийдин. Санаабыт санааҕыт барыта туоллун, дьиэ кэргэҥҥитигэр дьолу, баай-дуол олоҕу баҕарабыт.
Саргылаана Сидорова,
үлэ бэтэрээнэ,
Томтор