Бу күннэргэ Өймөкөөн улууһун Томтор сэлиэнньэтигэр «Дойдум дьоно» диэн саҥа бырайыак сүрэхтэннэ. Бырайыак аата да этэринэн, сылааһынан арчылыыр, дууһаны сылаанньытар аналлаах.
Саҥа тэрээһини Томтор нэһилиэгин кыраайы үөрэтэр түмэлин дириэктэрэ Айталина Иванова, сүрүн исписэлиис Людмила Васильченко уонна түмэлгэ баҕа өттүнэн методиһынан үлэлиир Лиана Ядреева көҕүлээн ыыттылар. Көрдөрөр-иһитиннэрэр тиэхиньикэни дэгиттэр баһылаабыт Александр Сивцев “Дойдум дьоно” бырайыак бастакы таһаарыытын сүрүннээтэ. Кини үтүөтүнэн саха тэлэбиидэнньэтигэр Өймөкөөн улууһун туһунан үгүс клип көһүннэ, эҕэрдэлэр таҕыстылар, диэн махтана бэлиэтиир Айталина Прокопьевна.
Бырайыак сүрүн соругунан үлэ киһитин кытта тус көрсөн кэпсэтии-ипсэтии, кини сыралаах үлэтин киэҥ эйгэҕэ сырдатыы, кэлэр көлүөнэ дьоҥҥо анаан үйэтитии буолар. Маны сэргэ сыл устата ыытыллар көрсүһүүлэр түмүктэринэн альбом бэчээттэнэн тахсыаҕа.
«Дойдум дьоно» тэрээһин бастакы ыалдьытынан СӨ култууратын үтүөлээх үлэһитэ, Өймөкөөн улууһун уонна 2-с Бороҕон нэһилиэгин бочуоттаах олохтооҕо, үлэ бэтэрээнэ, «Албан аат» бэлиэ хаһаайката, о.д.а. наҕараадалардаах Роза Ивановна Готовцева буолла.
Роза Ивановна 1978 сылтан Томтор бибилэтиэкэтигэр үлэтин саҕалаабыта. Кини бу сыллар усталарыгар киһи эрэ сөҕүөх элбэх ситиһиилээҕин, дьон-сэргэ туһугар үтүө суобастаахтык үлэлээбитин бары да билэбит.
Роза Готовцева бииргэ үөрэммит үөлээннээхтэрэ Мира Томская, Николай Заболоцкай кини оскуолатааҕы сылларын, ааспыт кэми эргитэн, олус истиҥник, киһи эрэ истэ олоруон курдук ахтан аастылар. Көрсүһүү былаһын тухары бииргэ алтыспыт, үлэлээбит дьоно махтал тылларын тиэрдэн, араас көрүдьүөстээх да түгэннэри санаһан, сырдыы-үөрэ үллэһиннилэр.
Роза Ивановна 5 оҕо ийэтэ, 12 сиэннээх, 3 хос сиэннээх. Онон кини улахан, иллээх дьиэ кэргэннээх буолан дьоллоохпун диэн үөрэ-көтө үллэстэр. Кини иис абылаҥар ылларан, элбэх дьон көрдөһүүтүнэн уустаан-ураннаан оҥорбут үлэтин ааҕан да сиппэккин.
Р.И. Готовцева олох араас көстүүтүн, түһүүтүн-тахсыытын мындырдык ылынан, дьоҥҥо-сэргэҕэ махтана, нэһилиэгин олоҕо-дьаһаҕа тупсарыгар билигин даҕаны баар кыаҕынан көмөлөһө, үлэлэһэ, кыһалла сылдьар.
— Туох баар ситиһиим кэлэктиибим, кэргэним үтүөтэ, — диэн этэн туран, Роза Ивановна чугас дьонугар истиҥ махталын тириэртэ.
Бастакы көрсүһүүгэ сылдьыбыт дьон бука бары истиҥ-иһирэх тэрээһинтэн астыммыттарын, төрөөбүт түөлбэ сайдыытыгар сүҥкэн кылааттарын киллэрбит дьон-сэргэ аата ааттана, оҥорбут дьыалата сыаналана турарыгар баҕаралларын биллэрдилэр.
Сиһилии “Хотугу сардаҥа” хаһыакка ааҕыҥ.
Любовь Кривошапкина