Айар куттаах Өймөкөөн нэһилиэгин элбэх оҕолоох олохтоохторо Ульяна Викторовна уонна Филипп Васильевич Захаровтар улууска култуура эйгэтин сайдыытыгар тус кылааттарын киллэрэллэр.
Ульяна Викторовна Өймөкөөн нэһилиэгэр Винокуровтар дьиэ кэргэҥҥэ бастакы оҕонон төрөөбүтэ. — Ийэм – Любовь Семеновна, аҕам – Виктор Иннокентьевич. Бииргэ төрөөбүттэр төрдүөбүт. Үс кыыстан саамай кырабыт уол. Ийэм улаханнык ыалдьан күн сириттэн наһаа эрдэ туораабыта. Мин оччолорго 12 саастаах этим. Онон бырааппар, балтыларбар иккис ийэ кэриэтэ буолбутум. Аҕам үлэ бэтэрээнэ, «Сахаэнерго» тэрилтэтин «Өймөкөөн» ДЭС маастарынан үлэлээбитэ. Кини барыбытын атахпытыгар туруоран баран, бэйэтин олоҕун оҥосторго сананан, 2019 с. ыал буолан билигин Дьокуускайга олорор, идэтинэн үлэлиир, — диэн кэпсиир Ульяна.
Улялаах Филипп сүрэхтэринэн сөбүлэһэн, харахтарынан хайҕаһан 2009 с. ыал буолбуттара. Өймөкөөн нэһилиэгэр олохсуйан алаһа дьиэ тэриммиттэрэ 15 сыл буолла. Ыал аҕа баһылыга Филипп Мэҥэ Хаҥалас I-Наахара Тиэлиги нэһилиэгиттэн төрүттээх. Захаровтар үс оҕолоохтор. Улахан кыыс Амелия 13 саастаах, соҕотох уол Витя 9-таах, оттон кыра кыыс Ангелина биэһин туолбута.
Кэргэнниилэр иккиэн Өймөкөөн нэһилиэгин «Тымныы Оройо» култуура дьиэтин тутаах үлэһиттэрэ. Айар куттаах ыал оҕолоро эмиэ ырыа куттаахтар. Витя быйыл Томторго ыытыллыбыт «Дьүкээбил уоттара» улуустааҕы куонкуруска I истиэпэннээх лауреат аатын сүкпүтэ. Ону тэҥэ «көрөөччү биһирэбилэ» номинация хаһаайына буолбута, кэргэннии Харитоновтар анал бириистэринэн наҕараадаламмыта. Кини Өймөкөөҥҥө ыытыллыбыт өрөспүүбүлүкэтээҕи Олоҥхо Ыһыаҕар «Хотой Уолан» оҕо испиктээкилигэр сүрүн оруолу толорбута.
Амелия аҕатын дойдутугар Мэҥэ-Хаҥаласка Тиэлиги нэһилиэгэр 8-с кылааска үөрэнэ сылдьар. Кини ырыа-үҥкүү, фольклор ансаамбылларыгар дьарыктанар. Ону таһынан хабылык, хаамыска, теннис уонна волейбол секцияларыгар сылдьар.
Култуура эйгэтин үлэһиттэрэ ахсааннаах өрөбүл күннэрин олус харыстыыллар, бу кэми оҕолоругар аныырга дьулуһаллар. Дьиэ кэргэнинэн мста түстүлэр эрэ бииргэ ас астыылларын, айылҕаҕа сылдьалларын олус сөбүлүүллэр. Филипп уолун 4-5 сааһыттан бултка-алтка сыһыаран, бэйэтин кытта тэҥҥэ илдьэ сылдьар. Дьиэ таһынааҕы үлэни мэлдьи бииргэ оҥороллор.
Кинилэр олоххо девизтэрэ: «Саха сатаабатаҕа, кыайбатаҕа суох» диэн. Манан сиэттэрэн, сайдыылаах олоҕу кытта тэҥҥэ хаардыылыыр, Өймөкөөн нэһилиэгин биир тутаах ыалынан буолаллар.
Евдокия Егорова