Төрүт орто оскуолатын физкультура учуутала Павел Атласов оскуолабыт оҕолоругар хас күһүн аайы алтынньыга муус аннынан балыктааһын күрэҕин тэрийэн ыытар.
Быйыл тэрээһин таһымын улаатыннаран, күрэх Үлэ Дьоруойа Г.А. Кривошапкин-Дьоруой Дьарааһын төрөөбүтэ 115 сылын, Арассыыйаҕа Аҕа күнүн уонна Саха Өрөспүүбүлүкэтигэр Үлэ сылын чэрчитинэн барда.
Ол курдук, “Аҕа уонна уол” күрэх Индигир эбэбит “Үһүс үөс” диэн сиригэр ыытылынна. Манна уопсайа 8 хамаандаҕа “ыалдьа” кэлбит ийэлэр, аймахтар тоҕуоруһа муһуннулар. Күрэх иннинэ педагогическай үлэ бэтэрээнэ Егор Егорович Находкин аал уоту оттон, арыылаах алаадьынан күндүлээн, алгыс көтөхтө.
Тэрээһини сүрүн көҕүлээччи уонна тэрийээччи оскуола дириэктэрэ Г.А. Павлуцкай бу күрэх сыала-соруга Г.А. Кривошапкин-Дьоруой Дьарааһын аатын үйэтитии, ону таһынан саха норуотун үгэс буолбут дьарыгар балыктааһыҥҥа уол оҕону сыһыарыы, кинини иитиигэ аҕа оруолун күүһүрдүү буоларын чопчулаан билиһиннэрдэ.
Дьүүллүүр сүбэ (П.С. Атласов, Е.А. Слепцова, Г.А. Павлуцкий, Д.Н. Давыдов, Н.П. Атласов) быһаарыытынан, “Муус аннынан балыктааһын” күрэх түмүгүнэн 1-кы миэстэҕэ Егор уонна Арсений Артемович Атласовтар тахсан, кыайыы өрөгөйүн биллилэр.
2-с миэстэҕэ Михаил уонна Виталий Семенович Атласовтар таҕыстылар, оттон 3-с миэстэни Марат уонна Сергей Хаитович Каландаровтар ыллылар.
Кыайыылахтар бары бочуоттаах грамотанан, мэтээллэринэн, кубогынан уонна сыаналаах бириистэринэн наҕараадаланнылар.
Ити курдук күрэхтэһии түмүктэнэн кыттааччылар бука бары “өттүк харалаах, илии тутуурдаах” үөрэ-көтө тарҕастылар. Онон суолталаах уонна туһалаах сынньалаҥ буолан ааста. Тэрээһиҥҥэ күүс-көмө буолбут учууталларга уонна спонсордарга барҕа махталбытын тиэрдэбит.
Бу туһунан сиһилии “Хотугу сардаҥа” хаһыакка ааҕаарыҥ.
Елена Слепцова, учуутал,Төрүт