Кэлиҥҥи биэс сыл иһигэр бүтүн Арассыыйа уонна Сахабыт сиригэр элбэх оҕолоох дьиэ кэргэни өйөөһүҥҥэ ураты болҕомто ууруллар буолла.
РФ 2019 сылтан ыла дойду бэрэсидьиэнин Владимир Путин көҕүлээһининэн “Демография” национальнай бырайыак үлэлиир. Маннык федеральнай таһымнаах бырайыактар РФ дьонун-сэргэтин олоҕун тупсарыыга туһуланан күн баччааҥҥа диэри үлэлииллэр. Ол иһигэр өйөбүл сүрүн көрүҥүнэн “Оҕолоох дьиэ кэргэни үбүнэн өйөөһүн” бырайыак ордук суолталаах миэстэни ылар. Иккис, онтон кэлэр оҕолору төрөппүт ыалга ийэ хапытаала көрүллэр. Оттон 2020 сылтан бастакы оҕо күн сирин көрбүт ыалыгар эмиэ ийэ хапытаала олохтоммута, демография тупсарыгар төһүү өйөбүлүнэн буолбута саарбахтаммат.
Биһиги бүгүн Өймөкөөн улууһун элбэх оҕолоох ийэлэрин кытта кэпсэттибит.
Лидия Бондаренко, Уус-Ньара бөһүөлэгэ:
— Биһиги дьиэ кэргэҥҥэ үс уоллаахпыт. Улахан уолум Коля ааспыт сайын 14 сааһын туолан номнуо РФ гражданинын пааспарын тутта. Кини миэхэ кырачаан бырааттарын көрөргө-истэргэ, уһуйааҥҥа илдьэргэ тутаах көмөлөһөөччүм. Орто уолум Лева сааһа түөрдэ, саамай кырачааммыт Никита 2 саастаах.
Үс оҕону өйөбүлэ суох улаатыннарар, биллэн турар, уустуктардаах. Мин уолаттарбар судаарыстыбаттан көмө ылар буолан, махталым муҥура суох. Үрдүкү салалта элбэх оҕолоохтору өйүүр бэлиитикэни тутуһара саамай сөптөөх дии саныыбын.
Елена Обутова, Өймөкөөн нэһилиэгэ:
-Биһиги дьиэ кэргэммитигэр ааспыт ыйга үһүс оҕобут – Сияна диэн кыысчаан төрөөн, элбэх оҕолоох дьиэ кэргэн кэккэтин хаҥаттыбыт. Кэргэмминээн Саввалыын өссө икки оҕолоохпут: 5 саастаах улахан кыыспыт Аделина уонна үс саастаах уолбут Юлиан. Мин бэйэм элбэх оҕолоох дьиэ кэргэҥҥэ төрөөбүт буолан, тус бэйэм эмиэ улахан, иллээх дьиэ кэргэннэниэхпин баҕарабын. Оҕолорбутун этэҥҥэ улаатыннаран, олох киэҥ аартыгар атаарыахпыт турдаҕа. Судаарыстыба өттүттэн өйөбүл миэрэтэ элбээн, үгүс эдэр дьоҥҥо ол төһүү күүһүнэн буолар буоллаҕа.
Ил Дархан Айсен Николаев Саха сиригэр демографияны тупсарыы өссө биир көрүҥүн киллэрбитин туһунан маассабай тиһиктэргэ иһитиннэрэн тураллар. Ол быһыытынан, 2024 сыл тохсунньу 1 күнүттэн саҥа ыал буолар 25-гэр диэри саастаах эдэр дьоҥҥо биир кэлим 50 тыһ. солк. төлөнөр буолуоҕа.
Бу туһунан сиһилии “Хотугу сардаҥа” хаһыакка ааҕаарыҥ.
Любовь Кривошапкина