Үчүгэй сэлиэнньэтин олохтоохторо Заболоцкайдар 5 кыыстаахтар. Аҕалара Павел Михайлович «Теплоэнергосервис» тэрилтэтигэр маастарынан үлэлиир. Оттон ийэлэрэ Марина Андреевна – сатабыллаах дьиэ хаһаайката. Кинилэр сылгы, ынах сүөһү иититинэн дьарыктаналлар, ону таһынан ыал ийэтэ бэйэ дьыалатын тэринэн, нэһилиэнньэни бурдук аһынан хааччыйар.
«Биһиги нэһилиэкпитигэр бэкээринэ суох, онон Марыына абырыыр. Кини килиэбэ, туорда, бурдугун аһын эгэлгэтэ олус минньигэс», — диэн олохтоохтор хайгыыллар. Марина Андреевна дьиэтээҕи түбүгүттэн быыс булан, нэһилиэк олохтоохторугар эрэ буолбакка, ыстаада үлэһиттэригэр эмиэ бурдук аһын астаан бэлэмниир.
Заболоцкайдар улахан кыргыттара Анжела уонна Вероника куоракка олороллор, үлэлииллэр, Динара устудьуоннаан бүтэн, төрөөбүт нэһилиэгэр төннөн, үлэлии сылдьар. Төрдүс кыыс Уйгулаана 1-кы кылааска үөрэнэр, оттон мурун бүөтэ Сайаана уһуйаан иитиллээччитэ.
— Биһиги кыргыттарбыт саастарынан улахан арыттаахтар. Улахан кыыспыт номнуо 27-тэ, оттон кырабыт 4 саастаах. Улахан кыргыттарбыт оҕо эрдэхтэринэ судаарыстыба өттүттэн улахан көмө суоҕа, дьиэ кэргэн элбэх оҕолоох буолара бэйэҕиттэн ураты кими да долгуппат, соһуппат, буолуохтааҕын курдук өйдөбүл баара. Оттон билигин эдэр ийэлэртэн саҕалаан, Дьоруой ийэлэргэ тиийэ социальнай көмө, чэпчэтии арааһа көрүллэр, ийэ хапытаала баар. Мантан киһи үөрэр эрэ, истэргэ да олус үчүгэй. Дьиэ кэргэн олорор олоҕо тупсарыгар улахан күүс-көмө буолара саарбаҕа суох. Биһиги бу хапытаалбытын бакаа туһана иликпит, кыраларбыт улааталларыгар дьиэ ылар баҕа санаалаахпыт. Аны түөртэн элбэх оҕону төрөппүт ийэлэргэ «Үлэ бэтэрээнэ» ааты иҥэрии баар буолла диэбиттэрин олус сэргээбитим. Онон дойдубут, өрөспүүбүлүкэбит салайааччыларыгар биһиги махтаныах эрэ тустаахпыт.
Ийэҕэ, дьиэ кэргэҥҥэ болҕомто уурулуннаҕына эрэ оҕо төрөөһүнэ элбиир, дьиэ кэргэн туруга, олоҕо тупсар буоллаҕа дии. Дьиэ кэргэн – таптал биһигэ, дьол туоната, дойду эрэлэ диэн мээнэҕэ этиллибэт.
Кэлэр 2025 сылы Ийэ дойдуну көмүскээччилэр сылларынан биллэриллибитэ олус үчүгэй. Ийэ дойдуларын көмүскээн байыаннай дьайыыга сылдьар оҕолордоох ийэлэри, байыастар кэргэттэрин олус ытыктыыбын. Кинилэргэ, чугас дьонноругар этэҥҥэ буолууну баҕарабын. Саҥа дьылга эйэлээх олох, дьол, үөрүү үксүөҕэ диэн эрэнэбин, — диэтэ элбэх оҕолонуу дьолун билбит улахан дьиэ хаһаайката Марина Заболоцкая.
Кэпсэттэ Светлана НИКИФОРОВА