“Куһаҕан – үчүгэйдээх” диэбиккэ дылы, Дьокуускай Мархатын уонна Сатай икки ардыларыгар сытар Сатал түөлбэҕэ саҥа сыл бастакы күнүгэр элэктэриичэстибэ ситимигэр саахал буолан, тоҥуу-хатыы тахсыбытын кэннэ Ил Дархан бэйэтинэн орооһон, киин куорат дьаһалтатын өттүттэн кэккэ дьаһаллар ылыллан эрэллэр. Ол биир туоһута – бүгүн, атырдьах ыйын 31 күнүгэр, саҥа үөрэх дьылын көрсө куорат оптуобуһун 106-с №-дээх маршрута үлэтин саҕалаата.
Дьокуускай куорат дьаһалтатын баһылыга Евгений Григорьев бүгүн сарсыарда оптуобус сырыытын саҕалыыр сиэргэ-туомҥа кэлэн, Сатал олохтоохторун эҕэрдэлиир этиитигэр: “Бу боппуруоһу өссө быйыл саас көрөн-дьүүллэһэн баран, оптуобус сырыытын олохтуурга быһаарыы ылыммыппыт. Онтон үбүн-харчытын көрдөөн, куорат бүддьүөтүттэн сылга субсидияҕа анаан 4-түү мөл. солкуобайы көрөр буоллубут”, – диэтэ.
Манна таарыйа куорат баһылыга Сатал түөлбэ генеральнай былаанын 2024 сыл 1-кы кыбаарталыгар бигэргэтэргэ быһаарбыттарын иһитиннэрдэ. Оттон эрэйдээх-буруйдаах элэктэриичэстибэ ситимнэрин “Якутскэнерго” хампаанньа хааччыйыытыгар биэрэр-туттарар инниттэн уонунан сылларга мунньуллубут иэһи-күүһү төлөһүүгэ “Сатал” табаарыстыба салалтата түөлбэ олохтоохторун кытта күүскэ ылсан үлэлэһэригэр эттэ.
Оптуобус саҥа 106-с №-дээх маршрута Саталтан сарсыарда 7 чаастан киэһэ 8 чааска диэри күҥҥэ икки симиэнэнэн 1-гар сэттэтэ, 2-гэр түөртэ кырынар буолуоҕа. Марха иһинэн киирэн, ГАИ пуоһунан тахсан, көнөтүк аэропорт суолунан Дзержинскэй аатынан уулуссанан айанныыр уонна Поярков аатынан уулуссанан уҥа иэҕиллэн “Муус Хайанан” оптуобус вокзалыгар тиийэр маршруттаах.
Киин куорат дьаһалтатын тырааныспарга салалтатын начаалынньыга Эдуард Садовников “оптуобус бүтэһик тохтобула олохтоммут үрэҕи туоруур 1-кы даамба суола кэҥэтилиннэҕинэ, кытыы уулуссаларга олорор дьону улахан оптуобус тохтобулугар диэри таһарга анаан икки “Газель” дьоҕус оптуобуһу сырытыннарыахтарын” сөбүн иһитиннэрдэ.
Василий Никифоров