Биһиги хаһыаппытыгар суруллубутунан, соторутааҕыта улуустааҕы дьаһалтаҕа уопсастыбаҕа социальнай суолталаах бырайыактары көмүскээһин дьаарбаҥката ыытыллыбыта. Дьаһал РФ Дьиэ кэргэн уонна Саха сиригэр Оҕо саас сылларын чэрчитинэн тэриллибитэ.
Экспердэр быһаарыыларынан бастыҥнар истэригэр Томтор нэһилиэгиттэн Ньургустаана Дьячкова салайааччылаах «Амарах санаа алгыһа» диэн анал байыаннай дьайыыга сылдьар уолаттарга таҥас тигиитигэр, харысхал, уллуҥах оҥоруутугар аналлаах бырайыак эмиэ ааттаммыта.
Бырайыак кыттыылаахтарынан улуус бары нэһилиэктэрин иистэнньэҥнэрэ холбоһон тэриллибит «Өймөкөөн сомоҕо иистэнньэҥнэрэ» диэн түмсүү буолар.
Бу күннэргэ Дьокуускайтан анал матырыйаал ылларан, таҥаһы нэһилиэктэринэн үллэстэн, иис үлэтэ саҕаланна. Былаан быһыытынан футболка, ыстаан, харысхал, ыраастыыр-араҥаччылыыр оттоох мөһөөччүктэр, сылгы сиэлиттэн уллуҥахтар оҥоһуллуохтаахтар.
Нэһилиэк иистэнньэҥнэрэ билигин торумнаабыт үлэлэрин үмүрүтээри үлэ үгэнигэр сылдьаллар.
Мария Максимова