Ыам ыйын 22 күнүттэн 26 күнүгэр диэри Саха сиригэр праймериз ыытыллыаҕа. Онно быыбрадааччылар быйыл балаҕан ыйыгар ыытыллар Халыма-Индигирдээҕи 34 нүэмэрдээх биир мандаттаах быыбардыыр уокуругар Ил Түмэн депутатын талыы быыбарыгар кыттар кандидаты талыахтара.
Санатар буоллахха, бу иннинэ манна депутаттаабыт Сахамин Афанасьев былырыын алтынньыга РФ сенаторынан талыллыбыта. Кини оннугар Ил Түмэн депутатын миэстэтэ баччааҥҥа диэри аһаҕас турар.
“Биир Ньыгыл Арассыыйа” политическай партия Ил Түмэн быыбарыгар кандидаты талар Халыма-Индигирдээҕи 34 нүэмэрдээх быыбардыыр уокуругар барыллаан куоластааһыныгар кыттарга маннык дьон докумуоннарын туттардылар:
- КАЗДОБИН Максим Андреевич, » Поиск Золото» ООО генеральнай дириэктэрин солбуйааччы:
- КРИВОШАПКИН Евгений Александрович, “Өймөкөөн улууһа” муниципальнай оройуон дьаһалтатын муниципальнай баайы-дуолу салайыы салаатын начаалынньыгын солбуйааччы:
- СЕМЕНОВ Семен Николаевич, «Полярные авиалинии» АО көтөр салааҕа дириэктэрин бастакы солбуйааччыта
- СЛЕПЦОВ Евгений Михайлович, «Полярные авиалинии» АО оттугунан уонна материальнай техническэй, автотранспортнай хааччыллыыга дириэктэрэ:
«Биир ньыгыл Россия» партия дьон санаатын быһаарар сыалтан тэрийэр барыллаан куоластааһыныгар кыттарга регистрацияны pg.er.ru сайтка ааһан, куоластааһыҥҥа кыттыахха сөбүн санатабыт. Праймеризка куоластыан баҕалаах дьон Госуслуги портал нөҥүө эрдэттэн регистрацияны барыахтаахтар.
Электроннай ньыманан ыытыллар б.дь. ыам ыйынааҕы барыллаан куоластааһын (праймериз) Халыма-Индигирдээҕи 34 нүөмэрдээх биир мандаттаах быыбардыыр уокуругун сиригэр-уотугар Абый, Үөһээ Халыма, Муома, Өймөкөөн уонна Орто Халыма улуустара киирсэллэр.
Ирина ПЕТРОВА бэлэмнээтэ