Бу дьыл атырдьах ыйын 20 күнүгэр Өймөкөөн улууһун Бочуоттаах олохтооҕо, СӨ үөрэхтээһин систиэмэтин Бочуоттаах бэтэрээнэ, үлэ бэтэрээнэ Ефимов Револий Степанович 85 сааһыгар күн сириттэн барда.
Ефимов Р.С. 1938 с. Өймөкөөн нэһилиэгэр төрөөбүтэ. 1964 с. Дьокуускайдааҕы педучилищены бүтэриэҕиттэн төрөөбүт дойдутугар физкультура учууталынан үтүө суобастаахтык үлэлээбитэ. Онтон кэтэхтэн үөрэнэн история уонна обществознание учууталын дипломун ылбыта.
Револий Степанович олоҕун устатын тухары чөл олоҕу тутуһар, маассабай успуорт сайдыытыгар дууһатынан ыалдьар киһи этэ. Кини уруоктарыгар өрүү учуутал уонна үөрэнээччи икки ардыгар үтүө быһыы-майгы сатыылыыра, учуутал хас биирдии оҕо уратытыгар уонна ис кыаҕар эрэнэрэ. Р.С. Ефимов успуорт нөҥүө үүнэр көлүөнэ тус сыалын ситиһэригэр дьулуурдаах, кытаанах санаалаах буоларыгар үөрэтэрэ.
Р.С. Ефимов үлэлиирин саҕанааҕы оскуола, нэһилиэк успуорка ситиһиилэрэ барыта кини сырдык аатын кытта ыкса сибээстээхтэр. Дэлэҕэ даҕаны кини үөрэнээччилэрэ улууска эрэ буолбакка, өрөспүүбүлүкэҕэ, Арассыыйаҕа биллэр-көстөр спортсменнар буола үүнүөхтэрэ дуо. Револий Степанович көҥүл тустууга түөрт ССРС маастарын, түөрт успуорт маастарыгар хандьыдааты, 40-н тахса көҥүл тустууга бастакы разрядтаах спортсменнары иитэн таһаарбыта. СӨ үөрэхтээһинин туйгуна Р.С. Ефимов 30-н тахса иитиллээччилэрэ физическэй култуура үрдүк үөрэх кыһаларын бүтэрэн, орто уонна спортивнай оскуолаларга учууталларынан, тириэньэрдэринэн таһаарыылаахтык үлэлии-хамсыы сылдьаллар.
Ытыктыыр кэллиэгэбит сырдык мөссүөнэ умнуллуо суоҕа, хаалларбыт дьыалата өрүү салҕана туруоҕа.
Биир идэлээхтэрэ Ефимов Р.С. дьиэ кэргэнигэр, аймахтарыгар дириҥ кутурҕаммытын тиэрдэбит.
Н.М. Заболоцкай-Чысхаан аатынан Томтор орто оскуолатын кэлэктиибэ