Тапталлаах аҕабыт, Сϴ үɵрэҕириитин туйгуна, Саха сирин мелодистарын ассоциациятын чилиэнэ, үлэ бэтэрээнэ Власий Семёнович Кондаков, төрөөбүтэ 80 сылыгар аналлаах иhирэх кэпсэтии, ахтыы киэһэтэ олус тэрээһиннээхтик, долгутуулаахтык буолан Өймөкөөн нэһилиэгэр буолан ааспыта.
Биһиги ахтыы киэһэтин хайдах-туох тэрийэбит диэн санааҕа киирбиппит ыраатта. Аҕабыт өр сылларга үлэлээбит оскуолатын кэлэктиибин салайааччыта Е.Г. Посельская, «Тымныы Оройо» кулууп салайааччыта У.В. Захарова, эдьиийдээтэр эдьиийбит В.М. Ксенофонтова, күтүөппүт П.Н. Ксенофонтов, С.С. Сивцев, аҕабыт балта Өймөкөөн көмүс күөрэгэйэ А.С. Готовцева бииргэ түмсэн тэрээһини биир санаанан көхтөөхтүк тэрийбиттэриттэн олус астынным.
Төрөөбүт дойдум Өймөкөөн кыһыҥҥы суола арыллан быраатым Александр, күтүөппүт Александр сымнаҕас айаннарынан этэҥҥэ дойдубутугар үктэммиппит. Биһигини куораттааҕы быраатым Власик, балтым Настя, сиэннэр алгыы хаалбыттара.
Үөрэммит оскуолам боруогун аһан киирээт, кэпсэтиибит табыллар буолла диэн санаа кууһан, уоскуйан-налыйан хаалбытым.
Дьоро киэһэбит О.В. Сивцева тылларыгар, В.С. Кондаков мелодиятыгар «Тапталлаах мин кыһам» оскуола гимнынан саҕаламмыта. Липа, элбэх оҕолоох ыал ийэтэ, билигин да бэйэтэ ырыа айан ыллыы сылдьара олус кэрэхсэнэр. Дойдубут тымныытыттан толлубакка иһирэх киэһэбитин уһуйаан оҕолоро Дарина Старкова, Намыына Старкова, Рияна Малых, Дима Варламов, (видеонан эҕэрдэ) Валерия Боронцоева (сал. С.И. Аммосова) киэргэттилэр.
Корякиннар ыал мааны кыргыттара Николина, Нарыйа, Найаана уонна кыттааччылар ыллаан-туойан Ксенофонтовтар дьиэ кэргэнтэн үөрүүлээх быһыыга-майгыга харчынан бириэмийэ туттулар.
Саргын Сивцев акапелла ыллаан доргутта. Витя Захаров ийэтин Ульяна Викторовнаны, аҕатын Филипп Васильевиһы батан, ырыаһыт бэрдэ, салгыы талаанын сайыннаран иһиэ диэн эрэнэбин.
Оскуолам кэлэктиибэ, үөрэппит учууталларым билиҥҥэ дылы ыллыы-туойа, үҥкүүлүү сылдьаллара сөхтөрөр да, үөрдэр да. Тэрээһиҥҥэ кылааһым салайааччыта И.Ф. Кондакова, аҕам маҥнайгы үөрэнээччитэ Н.Г. Дягилева, аҕам үлэлиир сылларыгар дириэктэрдээбит И.Ф. Сивцева, А.Е. Алексеева, Л.Д. Сивцева, А.С. Готовцева, бииргэ алтыспыт дьонум Е.Г. Посельская, А.Г. Винокурова, Е.К. Аммосова, Л.П. Аммосова, М.С. Иванова, С.У. Сивцева кытыннылар. Эдэр учууталлар ыллаан-үҥкүүлээн, олус эрчимнээхтэр. Техническэй үлэһиттэр эмиэ туора турбакка остуол тардан, сандалыга ыҥыран, итии, үүттээх чэйинэн күндүлээтилэр. Киһи сэргиирэ диэн, быраатым Гриша сүөһүтүн эһэн кэбиспэккэ, кыһыннары ыан олороро үчүгэйин эриэхсит. Инньэ гынан үүттээх чэйи дуоһуйа иһэн өссө дьоллоннум. Биһиги аҕабыт чугас табаарыһа, чуор куоластаах П.А. Дьячковскай доҕоругар анаабыт ырыатын баяныгар доҕуһуоллаан, ыллаан-туойан үөртэ.
«Туйаарыма» ансаамбыл кыргыттара, аҕам үөрэнээччилэрэ Н.М. Дьячкова, О.Ф. Суздалова олус да намыын, кэрэ куоластарынан киэһэни киэргэттилэр, киһи истэ эрэ олоруох курдук. Аҕам өссө биир үөрэнээччитэ Е.А. Готовцева- Күндээрэ бэйэтэ айбыт хоһоонун ааҕан биһигини олус сэргэхситтэ. С.С. Сивцев (эмиэ үөрэнээччитэ) фотоаппарат кыбыныылаах сылдьан хаартыскаҕа түһэрдэ, ыллам ырыатын бэлэхтээтэ. У.В. Захарова сэргэх ырыатыгар бары үҥкүүлээн тэйдибит.
Үөрэппит оҕолоро, Өймөкөөн нэһилиэгин баһылыга П.В. Васильев, Л.Н. Старкова уонна кыраайы үөрэтээччи Т.Е. Васильева, Т.И. Луковцева аҕабын истиҥ тылларынан ахтан-санаан аастылар.
Тымныы Оройо ыраах буолан, аҕам бииргэ үлэлээбит дьоно бэйэлэрин ахтыыларын видеоҕа устан ыыттылар: В.А. Аммосова, О.С. Сивцева, Т.П., В.Е. Винокуровтар, аҕам тиһэх сылларыгар үлэлээбит «Индигир» ансаамбыл салайааччыта Т.Н. Северьянова, үөрэнээччилэрэ, бииргэ үлэлээбит дьоно, Амматтан утумнааччылара — Е.Я. Яковлева, Дьокуускайтан — А.П. Иванов, Тааттаттан — Я.М. Слепцова, Сордоҥноохтон — И.Е. Алексеева, Өймөкөөнтөн — Н.Г. Ефимова уо. д. а.
Дойдум дьоно сылаастык көрсөн, иhирэх кэпсэтии, ахтыы тэрээhинигэр ɵйгүтүнэн-санааҕытынан, сүбэҕитинэн-амаҕытынан, ырыаҕытынан, хоһооҥҥутунан, үҥкүүгүтүнэн көхтөөхтүк бэлэмнэнэн кыттыбыккытыгар, күүс-кɵмɵ буолбуккутугар ис сүрэхпититтэн Власий Семёнович Кондаков оҕолоро, сиэннэрэ махталбытын тиэрдэбит.
Барыгытыгар кытаанах доруобуйаны, күн сирин бары үтүɵтүн, кэрэтин баҕарабыт. Алаhа дьиэҕит сылаас буолуохтун, үɵрүү-кɵтүү үктэллэнэн, дойдубут сылаас тыынынан угуттанан, сырдыгынан сыдьаайа сылдьыҥ!
Кыыһа Галина Кондакова, Власий Кондаков оҕолоро уонна сиэннэрэ