Сэтинньи 4 күнүттэн “Саха” НКИХ көрөөччү киэҥ биһирэбилин уонна сэҥээриитин ылбыт «Үҥкүүлээ» куонкурус бэрт тэтимнээхтик саҕаланна.
Куонкурус сүрүн быраабылатынан идэтийбэтэх үҥкүүһүттэр кытталлар. Уопсайа 7 кыттааччы баар, кинилэргэ Дьокуускайга биллэр-көстөр үҥкүү бөлөхтөрө көмөлөһөллөр. Быһа эфиргэ хас субуота аайы көстөр. Бырайыак ахсынньы 23 күнүгэр дылы буолар.
Бу куонкуруска биһиги биир дойдулаахпыт, Сордоҥноох биир кэскиллээх ыччата Василий Борисов ситиһиилээхтик кытта сылдьар. Василий Арктикатааҕы судаарыстыбыннай агротехнологическай университет инженернай факультетыгар үөрэх маастарынан үлэлээбитэ 2-с сылыгар барда. Ол быыһыгар, 1-кы уонна 2-с куурус кураторскай бөлөхтөрүн салайар. Кэргэннээх, кыыс оҕолоох.
«Миигин бииргэ үлэлиир кэллиэгэлэрим, дьиэ кэргэним өйүүллэр. Бу бырайыак инникибэр наада буолуо дии саныыбын. Сордоҥнооххо үөрэнэ сылдьан «Саһарҕа» ансаамбылга ситиһиилээхтик дьарыктаммытым. Үксүн норуот үҥкүүлэрин толорор этибит.
Онтон бу куонкуруска аныгы хамсаныылаах үҥкүү араас хайысхаларын туруорабыт. Бу бырайыакка кытта сылдьан тэтимнээх үҥкүү хайысхата элбэҕин биллим. Интэриэһинэй дьону-сэргэни кытта билсэн эрэбин.
Сүрүн уустугу бириэмэни сөпкө аттарыыга көрсөбүн. Үлэ, дьиэ кэргэн сүпсүлгэнин быыһыгар күн аайы күрэххэ бэлэм күүстээхтик барар. Холобура, биир үҥкүү нүөмэрин ансаамбылга ыйы быһа чочуйар буоллахпытына, билигин куонкурус быраабылатынан хас нэдиэлэ аайы саҥа, сонун үҥкүү туруора охсуохтаахпыт.
Икки ый устата мин «Инсайд» үҥкүү бөлөҕүн кытта нүөмэр туруорабыт.
Биир дойдулаахтарбар үҥкүүнү өрө тутуҥ, үҥкүүнэн дьарыктаныҥ диэн ыҥырабын уонна бу куонкуруска өйүөххүт диэн эрэнэбин», – диэн кэпсээннээх буолла Василий Борисов.
Василийга үрдүк ситиһиини баҕарабыт. Биир дойдулаахтарбытын субуота аайы “Саха” НКИХ биэриитин киэһэ 20.00 ч. көрүҥ, Василий Борисовы сыаналааҥ диэн ыҥырабыт!
Ольга Скрыбыкина