Соторутааҕыта биир дойдулаахпыт, Н.О. Кривошапкин аатын сүгэр Өймөкөөн орто оскуолатын выпускнига, үөрэппит оҕобут, анал байыаннай дьайыы кыттыылааҕа Семен Сивцевы кытта көрсүһүү тэрийдибит.
Орто сүһүөх уонна үрдүкү кылаас үөрэнээччилэрэ уонна учууталлар Семены ытыс тыаһынан эҕэрдэлээн көрүстүбүт. Кини Херсонскай уобаласка ГПО (гранато — пулеметнай отделениеҕа) наводчигынан сылдьыбыт. Уолбут иккитэ бааһыран, госпиталларга эмтэнэн, дойдутугар этэҥҥэ эргиллэн кэллэ.
Семен сэрии туһунан сиһилии тэнийэн кэпсии-ипсии барбата. Ол өйдөнүллэр дьыала дии саныыбын. Кини хорсун быһыытын түөһүгэр иилиммит «За боевые отличия» уонна «Александр Суворов» диэн суруктаах бэлиэлэрэ туоһулууллар.
— Бэйэбит чааспытыгар сахалар үһүө этибит. Биирбит эдэр уол этэ, иккиспит саастаах киһи буолан, биһиэхэ аҕабыт тэҥэ киһи буолбута, — диэн кэпсээтэ Семен.
Көрсүһүүгэ Сэмэнчиги билии кыһатыгар сиэтэн киллэрбит бастакы учуутала Агафья Степановна Готовцева кини оҕо сааһын туһунан сырдатта. Алын кылааска сылдьан үөрэммит хаартыскаларын көрдөрдө уонна оскуолатааҕы кэмнэрин умнубакка саныы-ахта сылдьарын туһугар чуораанчык бэлэхтээтэ.
Мин Семен орто сүһүөххэ үөрэнэр кэмигэр кылаас салайааччытынан үлэлии сылдьыбыт буолан, ол кэмнэртэн санаан кылгас ахтыы оҥордум.
Ону тэҥэ бэтэрээн-учуутал Алисия Ивановна Платонова эдэр киһиэхэ бэйэтин илиитин сылааһын иҥэрбит сахалыы харысхалын бэлэх уунна. Оттон оскуола үөрэх чааһын сэбиэдиссэйэ Анна Гаврильевна Винокурова күндү ыалдьыкка кэлэктиип аатыттан махтал суругу, атыыһыт-меценат Н.О. Кырбааһаҥкын туһунан альбом-кинигэни өйдөбүнньүк быһыытынан туттарда.
Семен оҕолорго үөрэхтэригэр ситиһиилэри, бэрээдэктээх буолалларыгар баҕарда.Манна даҕатан эттэххэ, Семен бииргэ үөрэммит үөлэннээҕэ эмиэ байыаннай дьайыыга сылдьан кэлбитэ. Оттон биир уол уоппускаҕа кэлэн баран, төнүннэ. Ити курдук биһиги нэһилиэктэн хас да эдэр ыччат байыаннай дьайыы кыттыылаахтара буолаллар. Кинилэр тустарыгар бары ыалдьабыт, долгуйабыт, этэҥҥэ дойдуларыгар эргиллэн кэлэллэрин күүтэбит.
Бэрт аҕыйах сыллааҕыта оскуола паартатыгар олорбут оҕобут Семен этэҥҥэ сэрии хонуутуттан кэллэ. Кини билигин бэйэтэ ыал эрэллээх эркинэ, икки эмдэй-сэмдэй уоллаах кыыс тапталлаах аҕата буолар.
Сэмэнчикпит доруобуйатын чөлүгэр түһэрэн, ханнык да ыарахаттартан чаҕыйбакка- толлубакка, олох үөһүгэр сылдьарыгар, этэҥҥэ эрэ буоларыгар баҕарабыт.
Тамара ВИНОКУРОВА,
биһиги общ.корр.
Өймөкөөн