Кириэс-Томторго 1925 сыллаахха бастакы ааҕар балаҕанҥа Владимиров Захар Спиридонович 1928-1929 сылларга дылы үлэлээбит. Кини киэһэ аайы дьону мунньан кинигэ ааҕара уонна нэһилиэнньэни ааҕарга үөрэппитэ. Онтон 1929 с. Холмогоров Михаил Семенович 1930 с. дылы үлэлээбит. Бу сылларга ааҕар балаҕанҥа 300 кинигэ уонна «Автономная Якутия», «Кыым» диэн хаһыаттар хойуутан да буоллар кэлэллэр эбит.
1931 -1932 сыллардаахха бибилэтиэкэҕэ Тимофеева Анна Ивановна үлэлээбит. 1934 с. күһүн Өймөкөөн нэһилиэгэ оройуон киинэ буолбута. 1935 с. кулууп дьиэтэ аһыллыбыт, онно «Кыһыл муннукка» бастакы оройуоннааҕы бибилэтиэкэ тэриллэр. Манна учууталлар, оскуола үлэһиттэрэ үлэлээбиттэр. 1940 с. Дьокуускайтан бибилэтиэкэр идэлээх Мучина Матрена Тимофеевна кэлэн, үлэни бэрээдэктээбит, бибилэтиэкэҕэ баар кинигэлэри учуокка туруорбут. 1953 с. туспа дьиэ биэрэннэр, дьэ онно бибилэтиэкэ буолбут. Итиннэ Свешникова Мария Семеновна 1956 с. дылы үлэлээбит.
Рудых Маргарита Дмитриевна 1956-1961 сс. үлэлээн, кинигэлэргэ классификация уонна каталогизация оҥорон, бибилэтиэкэ аатын сөргүтэр. Ити кэмҥэ оройуон бибилэтиэкэтин пуондата лаппа эбиллэн 6523 кинигэҕэ тиийэр.
1972 сыллаахха оройуон бибилэтиэкэтин Томтор нэһилиэгэр көһөрөллөр. Сэбиэдиссэйинэн Прокопьева Полина Степановна үлэлиир. Кинини кытта Скрыбыкина Раиса Давыдовна, Егорова Евдокия Семеновна үлэлииллэр.
1980 с. сэтинньитигэр, аҕыс тиһиктээх ( филиаллаах), оҕо бибилэтиэкэтэ Уус-Ньараҕа, киин бибилэтиэкэ Томторго олохтонор. Өймөкөөннөөҕү кииннэммит бибилэтиэкэ систиэмэтэ тэриллэр. Манна дириэктэринэн үлэлиир Розалия Ивановна Готовцева Хабаровскайдааҕы култуура институтугар бибилэтиэкэ салаатын бүтэрбитэ.
Ол сылга бастакы үлэһиттэр Агния Егорова, Фекла Винокурова Усть-Каменегорскайга бибилэтиэкэ идэтин баһылаабыттара. Кинилэр анал идэлээх буолан, үлэлэригэр саҥа сүүрээни киллэрэн, бибилэтиэкэ үлэтэ олохтоохторго суолтата үрдээн, кинигэлэрин ахсаана элбээн, ааҕааччылара өссө эбиллэр.
Сиһилии «Хотугу сардаҥа» хаһыакка ааҕыҥ
Надежда Литвинцева, улуустааҕы тэрийэр салаа
сэбиэдиссэйэ, Томтор