Өймөкөөн улууһун нэһилиэнньэтин социальнай көмүскэлин салаатын кылаабынай исписэлииһэ Инна Саввинова кэллиэгэлэрин кытта быйыл нэһилиэктэринэн сылдьан олохтоохтор социальнай хантараагы хайдах түһэрсэрсиэхтэрин сөбүн туһунан сырдаппыттара, нэһилиэнньэни консультациялаабыттара.
Бу сылга Өймөкөөн оройуонугар социальнай хантараагы 67 кыра духуоттаах ыал туһанна. Үчүгэй нэһилиэгин олохтооҕо Ольга Слепцова дьиэ кэргэнэ бу өйөбүл туһунан истэн, бэйэ дьыалатын тэринэргэ быһаарыммыта. Ол курдук Ольга Гаврильевна уонна Александр Константинович биэни уонна убаһалары атыылаһан, сылгыны иитиинэн дьарыктанарга быһаарыммыттара.
— Мин социальнай хантараагы түһэрсии туһунан нэһилиэнньэ көмүскэллээх буолуутун салаатын үлэһиттэриттэн сэргии истибитим. Кинилэр күһүн Үчүгэй нэһилиэгэр командировкаҕа кэлэ сылдьан, судаарыстыба өйөбүлүнэн туһаныы ньымата үлэлиирин туһунан олохтоохторго иһитиннэрбиттэрэ уонна тустаах сүбэ-ама биэрбиттэрэ.
Эт сыаната сыл аайы үрдүү турар буолан, эти дьонтон атыылаһыан кэриэтэ, бэйэни-бэйэ хааччынара ордук буоллаҕа.
Кэргэним ийэтэ Луиза Константиновна бэйэтин кэмигэр эмиэ сүөһү ииттэ сылдьыбыт. Онон тыа ыалын сиэринэн бэйэ иҥэмтэлээх бородууксуйатынан үссэнэр санаа киирбитэ.
— Биһиги түөрт оҕолоохпут. Улахан оҕолорбут Ангелина уонна Саша улаатан, билигин үлэ-хамнас дьоно. Кыра кыыспыт Амелия устудьуоннуур. Саамай кырабыт Игорь 2-с кылааска үөрэнэр. Кэргэним Александр Константинович Үчүгэй орто оскуолатыгар учууталлыыр. Мин муниципальнай сулууспа исписэлииһэ үөрэхтээхпин, — диэн кэпсээтэ О.Г. Слепцова.
Ыччат тыа сиригэр олохсуйар буоллаҕына түөлбэ эстибэт, сайда-кэҥии турар буоллаҕа. Эдэр дьон өбүгэ үгэһин утумнаан төрүт үгэскэ кубулуйбут дьарыгын өссө сайыннарар, кэҥэтэр кыахтаах. Оччотугар толооҥҥо-сыһыыҥҥа сыспай сиэллээх, хороҕор муостаах дэлэйиэ, олох-дьаһах тупсан иһиэҕэ.
Бу курдук үтүө хамсааһын үбүттэн тирэх ылан, бэйэ дьыалатын сайыннаран үлэлии сылдьааччылар улууспутугар аҕыйаҕа суохтар. Онон баҕалаахтар бэйэҕит нэһилиэккит дьаһалтатыгар сайаапкаҕытын, докумуоннаргытын биэриэххитин сөп.
Сиһилии «Хотугу сардаҥа» хаһыатыгар ааҕыҥ
Евдокия ЕГОРОВА