Сордоҥноох нэһилиэгэр 5 оҕолоох Винокуровтар дьиэ кэргэн бур-буруо таһааран олорбуттара быйыл номнуо 24 сыллара.
Аҕа баһылык Александр Александрович нэһилиэк биир тутаах киһитэ, «АрктикТелекомҥа» сибээс инженерынан үлэлиир. Телевизор көстүбэт буоллаҕына, интернет ситимэ хааччахтаатаҕына, сордоҥноохтор бары тутатына киниэхэ эрийэллэр. Саха ыалын аҕата дьиэ тутаах өһүөтэ буолар буоллаҕына, ыал ийэтэ — кини сылаас холумтана. Дьиэ кэргэн туллар тутааҕа, ийэлэрэ Альбина Алексеевна оскуолаҕа үлэлиир. Кини Сордоҥнооххо кийиит, ыраах Абыйтан төрүттээх.
Винокуровтар дьиэ кэргэн иллэҥ кэмнэрин тыаҕа отонноон, тэллэйдээн, бултаан атааралларын туохтааҕар да ордороллор. Бириэмэ көһүннэҕинэ бары бииргэ киинэ көрөллөрүн, ас астыылларын сөбүлүүллэр. Оҕолор эһэлэрин коллекциятын салҕаан значок мунньаллар. Билигин номнуо 300-чэ баар. Кыра кыыс Аливия эбэтин дельфин сувенирдарын коллекциятын сөргүтэн, мунньан саҕалаабыт.
Аҕа баһылык Александр туохтан да толлубакка барытыгар ылсан иһэр. Ол курдук, чороонтон саҕалаан ыскаап арааһын уһанар.
Уран тарбахтаах ыал ийэтэ Альбина араас дьэрэкээн ойуулаах холбуйа эгэлгэтин оҥорор, нэһилиэнньэттэн сакаас ылан иистэнэр уонна баҕалаах дьону үөрэтэр, бэйэтин билиитинэн үллэстэр. Маны тэҥэ кыбытыктаан тигэрин сөбүлүүр. Онон нэһилиэккэ туһалаах дьыаланан дьарыктанар ыалынан биллэллэр. Винокуровтар актыбыыстар, нэһилиэккэ ыытыллар бары тэрээһиҥҥэ дьиэ кэргэнинэн көхтөөхтүк кытталлар.
Александр уонна Альбина оҕолорун олоххо бэлэмнээх буолалларын туһугар аһаҕастык кэпсэтиһэн, хайҕаһан, оҕо бэйэтин баҕатынан сайдарыгар араас куруһуоктарга сырытыннаран, бэйэлэригэр эрэллээх киһи буолан тахсалларын туһугар ыкса үлэлэһэллэр. Винокуровтар дьиэ кэргэттэрэ бэйэлэрин олоххо көрүүлэринэн, дьоҥҥо сыһыаннарынан оҕолоругар үтүө холобур буолаллар.
Ольга Скрыбыкина, биһиги корр.