Аҕа дойдуну көмүскээччилэр күннэригэр анаан тыа сиригэр араас тэрээһиннэр ыытылылыннылар.
Томтор эр бэртэрэ сэргэх тэрээһиҥҥэ кытыннылар
Томтордооҕу кыраайы үөрэтэр түмэл үлэһиттэрэ “Дойдум дьоно” бырайыак чэрчитинэн нэһилиэк дьонугар көрдөөх күрэхтэһиини тэрийдилэр.
— 7 түһүмэхтээх күрэхтэһиигэ «Сулус» уонна «Дьулуур» хамаандалар кытынныллар.
Күрэх бары түһүмэҕэ олус интэриэһинэйдик, бэһиэлэйдик ааста. Эр дьоммут холкутук блиц-викторинаҕа, төрөөбүт дойду устуоруйатыгар, байыаннай сулууспаҕа сыһыаннаах ыйытыктарга хоруйдаатылар. Кумааҕыттан сөмөлүөт оҥоруу, бириэмэҕэ куобаҕы сүлүү, куһу үргээһин курдук көрдөөх түһүмэхтэр мустубут дьону олус сэргэхситтилэр. Саллаат хааһытын уочаратынан сүүрэн тиийэн кыра ньуосканан сиэһин тэрээһини тупсаран биэрдэ, күлүү-салыы көҕүлүттэн тутулунна.
Нэһилиэкпит аҕалара үлэлэриттэн быыс булан «Дойдум дьоно» бырайыакка кыттыбыттара кэрэхсэбиллээх, — диэн иһитиннэрдэ биһиги общ.корр. Дария Тихомирова. – «Сулус» хамаандаҕа Алексей Попов (хапытаан), Гаврил Дьячков, Константин Винокуров, Рустам Винокуров, Егор Березкин, Александр Артемьев, «Дьулуурга» Гаврил Торговкин (хапытаан), Леонид Сивцев, Сергей Винокуров, Геннадий Дягилев, Григорий Бурцев, Александр Сивцев киирдилэр.
— Араас көлүөнэ дьоно мустан, бүгүн үтүө өйдөбүнньүгү хааллардыгыт. Эһиги бары сопхуос саҕаттан үлэлээбит-хамсаабыт, буспут-хаппыт дьон быһыытынан устуоруйа тыыннаах кэрэһиттэрэ буоларгытын умнумаҥ. Онон ол кэмнээҕи хаартыскалартан саҕалаан, тугу өйдүүргүтүн аныгы технологияны туһанан, батсаап нөҥүө, аудиоҕа саҥаран, видеоҕа устан ыытаргытын күүтэбит, — диэн түмэл салайааччыта Айталина Иванова эр дьоҥҥо туһаайан эттэ.
Манна даҕатан эттэххэ, “Дойдум дьоно” бырайыагы көҕүлээччилэр хас ыытыллар тэрээһиннэрин аайы Өймөкөөн улууһун Өрөгөй ырыатын дьон-сэргэ дууһатынан ылынарын туһугар сахалыы, нууччалыы тылынан өрүү холбуур былааннаахтар.
“Аҕа дойдубун таптыыбын”
Төрүт нэһилиэгинээҕи П.Я. Тулааһынап аатынан култуура дьиэтин салайааччыта Надежда Босикова Аҕа дойдуну көмүскээччи күнүн көрсө нэһилиэккэ араас тэрээһиннэр ыытыллыбыттарын туһунан сырдатта.
Ол курдук, оскуолаҕа үгэскэ кубулуйбут стройунан хаамыы көрүүтэ ыытылынна. Онно оскуола выпускнига, Адмирал Невельскай аатынан Муоратааҕы судаарыстыбаннай университет 2-с кууруһун устудьуона Вениамин Лысов маанылаах ыалдьытынан буолла.
“Чэчир” уһуйаан иитиллээччилэрэ эмиэ убайдарыттан, эдьиийдэриттэн хаалсыбатылар, манна кырачааннар байыаннай парадтара буолла. Бу күн оҕолор аҕалара уһуйааҥҥа кэлэн тэрээһиҥҥэ көхтөөхтүк кытыннылар, олор истэригэр байыаннай дьайыы бэтэрээнэ Юрий Слепцов баар.
Төрүт нэһилиэгин кырачааннара өрөспүүбүлүкэҕэ биллэриллибит Оҕо саас сылынан төрөппүттэрин кытта бииргэ ыллыыллара, үҥкүүлүүллэрэ, хоһоон ааҕаллара кэрэхсэбиллээх.
Бырааһынньыктааҕы тэрээһин салҕыы кулуупка ыытылынна. Манна 7-18 саастаах уолаттар икки ардыларыгар “Бастыҥ ытааччы” диэн пневматическай бинтиэпкэнэн таба ытыы күрэҕэ буолла.
Оҕолор үс бөлөҕүнэн арахсан күрэхтэспиттэрин судьуйалар — дьаһалта баһылыга Владимир Алексеев, кини солбуйааччыта Алексей Кондаков уонна кулууп уус-уран салайааччыта Елена Слепцова сыаналаатылар.
Маны сэргэ кулуупка Аҕа көмүскэлин күнүн чэрчитинэн өссө да үгүс тэрээһин ыытылынна.
Любовь Кривошапкина