Былырыын олунньуга Украинаҕа анал байыаннай дьайыылар саҕаланыахтарыттан ыла аармыйаҕа хантараагынан сулууспаҕа ыҥырыы тэриллэр, бу хайысханан сулууспалыы барааччы ахсаана күннэтэ элбиир.
Аны билигин хантараагынан байыаннай сулууспа хандьыдаатынан кэрэ аҥардары эмиэ талар буоллулар. Ол туһунан эрэдээксийэҕэ Өймөкөөн улууһун баһылыгын э.т. Раиса Садыкова иһитиннэрдэ.
Арассыыйа Сэбилэниилээх күүстэрин Генеральнай штабын НР 2023 бэс ыйын НР 308/1/6895 ыйыытын толорор туһуттан, итиэннэ гражданнары хантараагынан байыаннай сулууспа кэмигэр уонна хаачыстыбыннайдык талар сыалтан, хантарааҕынан сулууспаҕа дьахтар аймаҕы ылыы тэриллэр.
Раиса Михайловна билиһиннэрбитинэн, дьахталлар радиотехническэй тэриллэри, араадьыйа сибээһин олохтооһуҥҥа, автоматизированнай тиһиги салайыыга, материальнай-техническэй хааччыллыы (ол иһигэр ас-үөл) чааһыгар, ону тэҥэ медицинскэй идэлэри кытта сибээстээх байыаннай дуоһунастарга үлэлиэхтэрэ.
Медицинскэй идэлээх гражданнары байыаннай хантараагынан талыы 25 уонна 40 Армейскай корпус тэриллэр медперсоналы эбии ылыы чэрчитинэн ыытыллар диэн иһитиннэрэллэр, диэтэ Р.М. Садыкова.
Байыаннай хантараагынан сулууспалыы барыан баҕалаах кыргыттары, дьахталлары Өймөкөөн уонна Муома улууһунааҕы военкомакка 2-14-46 тел. биитэр Өймөкөөн оройуонун дьаһалтатын мобилизацияламмыт гражданнар дьиэ кэргэттэрин өйүүр Штабка 2-10-44 тел. билсэргэ ыҥыраллар.
Байыаннай хантараагынан сулууспа туһунан суруйбучча, эр дьону хантараак сулууспатыгар ылыы туһунан санаттахха табыллар. Ол курдук, хандьыдаат быһыытынан 59-гар диэри саастаах, саппааска сылдьар эр дьону, сорох түгэҥҥэ 65-гэр диэри саастаах, доруобуйаларын туругунан байыаннай сулууспаҕа сөп түбэһэр “А”, “Б”, “В” категориялаах, 9 кылаастан намыһаҕа суох үөрэхтээх дьону көрөллөр. Билигин байыаннай эпэрээссийэҕэ кыттар сулууспалаахтарга көрүллэр төлөбүр 204 тыһ. солк. үөһэ суумаҕа тэҥнэһэр.
Ону тэҥэ, хантараагынан байыаннай сулууспаҕа киирбиттэргэ биир кэмнээх федеральнай уонна өрөспүүбүлүкэтээҕи төлөбүр көрүллэр. Биир сылтан үөһэ хантараак түһэристилэр да, 195 тыһ. солк. кээмэйдээх биир кэмнээх төлөбүрү ылаллар. Байыаннай сулууспаҕа киирдэххэ өрөспүүбүлүкэтээҕи төлөбүр бүгүҥҥүтэ 150 тыһ. солк. тэҥнэһэр, онтон байыаннай сулууспалаахтар дьиэ кэргэттэригэр – 200 тыһ. солк.
Санатар буоллахха, Дьокуускай куорат хантараагынан байыаннай сулууспаҕа сүүмэрдиир пууна РФ Сэбилэниилээх күүстэригэр хантараагынан байыаннай сулууспаҕа биир сылтан үөһэ болдьоххо дьону ылар.
Саха сиригэр хантараагынан байыаннай сулууспа боппуруостарын быһаарыыга службапоконтракту14.рф сайт үлэлиир. Электроннай былаһааккаҕа баҕалаахтар онлайн-сайаапка толоруохтарын сөп. Сайтка хантараагынан сулууспа туһунан толору иһитиннэрии, ханнык докумуоннар наадалара сурулла сылдьар.
Ону тэҥэ киин куоракка биир кэлим талар пууҥҥа приемҥа суруйтарыахха сөп. Пуун «Абырал» санаторийга баар, сарсыарда 9.00 ч. киэһэ 18.00 ч. диэри үлэлиир. Аадырыһа: Дьокуускай куорат, Сэргэлээх шоссетын 11 км, 1 корп. Ыйытыыларынан 32-10-40 билсиэххэ сөп.
Ирина Петрова