«Азия оҕолоро» норуоттар икки ардыларынааҕы VIII спортивнай оонньуу култуурунай бырагырааматыгар кыттан уонна волонтердар кэккэлэригэр киирэн, биһиги улууспут ыччата, дьоно-сэргэтэ оонньуулары өссө чугастык ылыннылар.
«Хотугу сардаҥа” хаһыат общественнай кэрэспэндиэнэ, Үрүҥ көмүс волонтер Валентина Прокопьева санаатын маннык үллэһиннэ:
— «Азия оҕолоро» аан дойдутааҕы спортивнай оонньууларга Үрүҥ көмүс волонтердар кыттарбытын истэн олус үөрбүппүт. Барыбытыгар биир тэҥ форма биэрбиттэрэ. Маннык үрдүк таһымнаах тэрээһиҥҥэ волонтердуурга 4 күн устата үөрэммиппит. Өймөкөөн Томторуттан төрүттээх Тимур Егоров волонтёрдарга сүрүн эппиэттээх үлэһитинэн сылдьыбытынан киэн туттабыт уонна киниэхэ улахан өйөбүлүн иһин махталбытын тиэрдэбит.
Оттон педагогическай үлэ бэтэрээнэ Маргарита Винокурова оонньуулары арыйыы үөрүүлээх сиэригэр-туомугар тус бэйэтинэн сылдьыбытын, олус биһирээбитин туһунан үөрэ-көтө ахтар.
— Тэрээһини бэркэ толкуйдаан туруорбуттар. Массовкаҕа олус элбэх оҕо-ыччат кыттыбыта кэрэхсэбиллээх.
Мин 1996 с. ыытыллыбыт бастакы “Азия оҕолоро” спортивнай оонньуулар арыллыыларыгар эмиэ сылдьар чиэстэммитим. Быйыл киин куораппыт Лермонтов аатынан уулуссата тупсубутун сэргии, куттал суоһаабатын туһугар ылыллыбыт дьаһаллары бэлиэтии көрдүм. Сахабыт сирин килбэйэр киинэ сылтан сыл тупсан, киэркэйэн иһэриттэн үөрэбит, киэн туттабыт.
“Хотугу сардаҥа” хаһыат общ.корр. Дария Тихомирова кэпсээбитинэн, Томтор нэһилиэгин “Кэскил” уһуйааныгар өр сылларга таһаарыылаахтык үлэлээн кэлбит үҥкүүгэ уһуйааччы Елена Иванова салайар «Дайаана» үҥкүү кэлэктиибэ 2004 с. “Азия оҕолоро» норуоттар икки ардыларынааҕы спортивнай күрэх култуурунай тэрээһинигэр кыттыбыттара. Бастакы иитиллээччилэрэ билигин номнуо
Индира Ефремова, Дьокуускай:
— Мин хореограф Елена Титовна Ивановаҕа кыра оҕо эрдэхпиттэн, уһуйаантан саҕалаан оскуоланы бүтэриэхпэр диэри “Дайаана” үҥкүү бөлөҕөр дьарыктаммытым. Үҥкүүнэн дьарыктаммыппыттан олус үөрэбин. Биһиги “Полярная звезда” курдук өрөспүүбүлүкэ таһымнаах элбэх куонкурустарга кыттар этибит. “Азия оҕолоро” спортивнай оонньуулар култуурунай бырагыраамаларыгар кыттыбыппыт олохпут биир саамай чаҕылхай түгэнэ буолар.
Диана Винокурова, Томтордооҕу Оҕо ускуустубатын оскуолатын “Һэйм” үҥкүү бөлөҕүн салайааччыта:
— «Һэйм» үҥкүү бөлөҕүн 2002 с. СӨ култуура туйгуна Валентина Баишева тэрийбитэ.
Мин бу бөлөххө дьарыктана сылдьан «Азия оҕолоро» спортивнай оонньуулар култуурунай бырагыраамаларыгар кэлэктииппин кытта хаста даҕаны кыттан турардаахпын. Аны билигин үөрэтэр оҕолорум быйылгы оонньуулар аһыллыыларыгар кыттар чиэстэннилэр. Иитиллээччилэрим маннык улахан таһымнаах тэрээһиҥҥэ кытталларыттан харахтара уоттанан, өрө көтөҕүллүүлээхтик сылдьыбыттарын көрөртөн ордук долгутуулаах уһуйааччыга суох буоллаҕа.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина