Алгысчыт, ырыаһыт, музыкант Андрей Иванов

Улууспут араас култуурунай тэрээһиннэрин айар талаанынан, дьоҕурунан киэргэтэр Андрей Петрович Иванов соторутааҕыта «Саха сирин баянистарын, аккордеонистарын, гармонистарын түмсүүтүгэр» киирбитин туоһулуур докумуону тутта.

БИҺИГИ Өймөкөөн орто оскуолатыгар үлэлиир кэммитигэр кулуупка ыытыллар тэрээһиннэр ураты тыыннаах, көхтөөх буолан үгүс дьону түмэр, сомоҕолуур этилэрэ. Ол курдук тэрилтэлэр икки ардыларыгар уус-уран көрүүгэ, үҥкүүгэ күрэхтэһии киэһэлэрэ олус сэргэхтик ааһаллара. Тэрилтэнэн кэнсиэртэргэ оскуола кэлэктиибэ инники күөҥҥэ сылдьара. Андрей Ивановтыын көрдөөх сыанкаларга хаста да олус тапсан оонньоон турардаахпыт. Кини ханнык да култуурунай-маассабай дьаһалтан туора турбат, туох да оруолтан аккаастаммат актыбыыс киһи. Олоххо актыыбынай позициятын өрүү илдьэ сылдьар.

Улууска, нэһилиэктэргэ ыытыллар култуурунай тэрээһиннэргэ Андрей Петрович алгысчыт, ырыаһыт, музыкант быһыытынан куруутун кыттан, биир дойдулаахтарын  биһирэбилин ылыан ылар.

Хаартыскаҕа: «Дорҕоон» эр дьон вокальнай ансаамбыла

КЫРААЙЫ үөрэтээччи, элбэх кинигэ ааптара Тамара Васильева «Түҥнэстибэт төлкөлөөх, өлбөөдүйбэт Өймөкөөнүм» диэн кинигэтигэр «Ырыа куттаахтарбыт» диэн балаһаҕа Андрей Иванов туһунан маннык суруйбут: «Биир ырыа куттаах киһибитинэн Үөһээ Бүлүүттэн төрүттээх күтүөппүт Андрей буолар. Нэһилиэк олоҕор ыытыллар бары тэрээһиннэр кинитэ суох барбаттар. Кини баяҥҥа, гитараҕа, синтезаторга үчүгэйдик оонньуур, ыллыыр буолан, сыанаттан түспэт артыыс. Маны таһынан алгысчыт, оһуохайдьыт уонна тамада буолан былдьаһыкка сылдьар биир бастыҥ киһибит. 2006 с. уолаттарга «Дьулуур» ансаамбылы тэрийэн, бэйэтэ суруйбут 20 ырыатыттан «Оҕо саас үҥкүүтэ», «Ийэ мичээрэ», «Оҕо сааһым хатыҥнара» диэн ырыаларын толотторон, уолаттар «Хотугу сулус» оройуоннааҕы куонкурус лауреаттара буолбуттара».

— Мин оҕо эрдэхпиттэн музыканы, ырыаны кэрэхсээн, сөбүлээн истэрим. Гармошканы аан бастаан 3-4-с кылаастарга үөрэнэ сылдьан илиибэр ылан оонньоон көрбүтүм. 7-с кылаастан аны баяҥҥа оонньуурга холоммутум. Үчүгэйдик оонньуур буолан, үрдүкү кылааска үөрэнэр кэммэр улахан дьоҥҥо кэнсиэртэргэ доҕуһуоллуур буолбутум, — диэн Андрей Петрович үөрүүтүн үллэһиннэ. — Сааһым тухары элбэх тэрээһиннэргэ кыттан оонньоон кэллим. Билигин музыкальнай инструменнарга — гитараҕа, аккордеоҥҥа, баяҥҥа, синтезаторга оонньуубун.

Андрей Петрович Иванов

ӨЙМӨКӨӨҤҤӨ саха биллэр ырыаһыта, мелодист, элбэх ырыа автора Алексей Потапов кэнсиэртии тиийэ сырыттаҕына билсибиппит. Кини мин хоһоон, ырыа айарбын истэн сэҥээрбитэ. Баяҥҥа оонньотон истэн баран «олох грамотнайдык оонньуур эбиккин», — диэн хайҕаабыта. Саха Сирин баянистарын профсоюһугар киирэрбэр сүбэлээбитэ.

— Онон бу оҕо эрдэхпиттэн таптыыр дьарыкпын туоһулуур Саха сирин баянистарын, аккордеонистарын уонна гармонистарын Союһугар киирбитим туһунан докумуону ылбыппынан киэн туттабын, — диэтэ А.П. Иванов.

ТАЛААННААХ биир дойдулаахпытын истиҥник эҕэрдэлээн туран, инникитин даҕаны Андрей Петровичка чэгиэн-чэбдик, чөл туругу, ырыа алыбыгар ылларан өссө да саҥа ырыалары айа, байаанын тыаһынан дьонун-сэргэтин сэргэхситэ, үөрдэ сылдьарыгар баҕарабын.

Тамара Винокурова,

биһиги общ. корр.,

Дьокуускай

 

 

Читайте дальше