Халлааҥҥа сулустар сырдыктык мичийэ тыгаллар. Муммут, куттаммыт киһиэхэ суолун ыйан, сырдатан биэрэллэр. Дууһатын уоскутан өй угаллар, эмтииллэр. Онуоха дьүөрэлээх Ийэ сир аанньала, таҥара киһи кэриэтэ улууспутугар биллэр, ытыктанар, уопуттаах бырааспыт Александра Егоровна Кондакова буолар.
Олоҕу уһатар, үөрүүнү үксэтэр, кэрэни кэрэхсии сырдык олоххо угуйар киһибитигэр барытыгар махтал буолуохтун!
Александра Егоровна Кондакова Өймөкөөн нэһилиэгэр элбэх оҕолоох Аммосовтар дьиэ кэргэннэригэр төрөөбүтэ. Кини оҕо эрдэҕиттэн олус оттомноох, холку, булугас өйдөөх, хоһуун-хоодуот кыыс этэ. Александра ханнык даҕаны ыарахан үлэттэн толлон турбат буолара: мас мастыыра, оттуура, кини сатаабатаҕа диэн олох суоҕа.
Александра Егоровна бииргэ төрөөбүттэрин барыларын, үгүс аймахтарын үөрэхтээх дьон оҥортообута. Бэйэтэ талан ылбыт терапевт-быраас идэтинэн өр сылларга эҥкилэ суох үлэлээн, билигин улуус киин балыыһатын биир тутаах үлэһитин быһыытынан биллэр. Элбэх киһи киниэхэ эмтэнэн үтүөрэн, ыарыарыыттан быыһанан, иккистээн төрөөбүт тэҥэ сананан, махтал тылларын этэр.
А.Е. Кондакова олоҕун барытын дьоно-сэргэтэ чэгиэн туруктаах, кытаанах доруобуйалаах буоларын туһугар анаабыт киһи киэнэ кэрэмэһэ, килбиэннээҕэ.
Сиргэ тиийэ бокулуон буоллун Эйиэхэ, убаастабыллаах Александра Егоровна!
Мария Слепцова-Сыдьаайа,Өймөкөөн