“Өймөкөөн Тымныы Оройо” МТ дьаһалтатын баһылыга Павел Васильев:
— Биир дойдулаахпыт, анал байыаннай эпэрээссийэ кыттыылааҕа, бастакы “Боотур” добровольческай этэрээт хамандыыра, Арассыыйа Дьоруойа Александр Колесов Өймөкөөн нэһилиэгэр кэлэ сылдьыбыта олохтоохторго үөрүүлээх түгэнинэн буолла.
Бу түгэн үүнэр көлүөнэ ыччаппытын патриоттуу быһыыга-майгыга иитиигэ төһүү күүһүнэн буолара саарбахтаммат.
Өймөкөөн улууһун Бочуоттаах олохтоохторо, үлэ бэтэрээннэрэ Тамара Егоровна Васильева уонна Прокопий Николаевич Ксенофонтов хорсун-хоодуот буойуҥҥа баҕа санаа бастыҥын эттилэр, алгыстарын анаатылар.
Оттон олохтоох дьаһалта аатыттан биһиги А.Г. Колесовка харчынан сертификат туттардыбыт. Ону тэҥэ биир үөрүүлээх сонуммутунан улуустааҕы дьокутааттар Сэбиэттэрин 2023 сыл бэс ыйын 16 күнүнээҕи VIII-32 №-дээх уураахтарынан, Александр Колесов Өймөкөөн улууһун Бочуоттаах олохтооҕо буолбутун бар дьонугар үөрүүлээх быһыыга-майгыга иһитиннэрдибит.
Любовь Кривошапкина