Өймөкөөн улууһугар 2022 сыл бүтүүтэ бигэргэммит “Өймөкөөн улууһа (оройуона)” муниципальнай тэриллиигэ 2023-2027 сс. экология өттүнэн үтүө туруктаах буолуу туһунан” диэн муниципальнай бырагыраама үлэлиир.
Бырагыраама кыылга-сүөлгэ, харамайдарга сыһыаннаах салаатыгар адьырҕаны кытта охсуһуу, ол эбэтэр бөрө, эһэ ахсаанын бэрээдэктээһин дьаһаллара ылыллыахтаахтара ыйыллар. Ол туһунан Өймөкөөн улууһунааҕы судаарыстыбаннай экологическай кэтээн көрүү инспекциятын салайааччыта Виталий Кондаков сиһилии быһаарар.
— Муниципальнай бырагыраама чэрчитинэн быйылгыттан бөрөнү уонна эһэни бултаһааччылары көҕүлүүр тэрээһиннэр ыытыллар буоллулар. Үбүлээһин боппуруоһа быһаарылынна. Сыл түмүгүнэн улуус үрдүнэн ордук элбэх бөрөнү уонна эһэни бултаабыттарга 100 тыһ. солк. суумалаах харчынан бириэмийэ көрүллэр. Манна даҕатан эттэххэ, дьиикэй кыылы бултаһааччы көҥүллүүр докумуоннаах, ол эбэтэр босхо лицензиялаах буолара ирдэнэр. Онуоха көҥүлү оройуоннааҕы инспекцияттан хаһан баҕарар ылыахха сөп, — диэн быһаарар Виталий Юрьевич. – Биир бөрөҕө 15 тыһ. солк. суумалаах харчынан бириэмийэ көрүллэр. Бу бырагыраама 2024 сылтан үлэлээн эрэрин санатабын. Соторутааҕыта бу боппуруоска тустаах дьону кытта көрсөн кэпсэтэн турабыт.
В.Ю. Кондаков бэлиэтээбитинэн, Өймөкөөн улууһугар 4 киһилээх бөрөһүттэр идэтиллибит биригээдэлэрэ үлэлиир. Кинилэр бу күннэргэ нэһилиэктэргэ уонна тулатааҕы сирдэргэ сылдьан балаһыанньаны билистилэр. Ол түмүгэр 11 адьырҕа баара билиннэ. Онон бөрөһүттэр икки хайысханан арахсан бултаһа бардылар: биирэ – Сунтаар үрэх баһынан таба ыстаадатыгар, иккиһэ – Бүрүгээндэ үрэх баһыгар.
— Эһэни бултаһар дьоҥҥо эмиэ сыл түмүгүнэн харчынан бириэмийэ көрүллэр. Манна биири тоһоҕолоон бэлиэтиэххэ наада. Тыатааҕы киһи олорор сиригэр чугаһаатаҕына, тута эһэни бултаһарга лицензия ылар туһуттан улуустааҕы инспекцияҕа биллэриллиэхтээх. Адьырҕа кыылы бултаан баран аахта оҥоһуллар, хаартыскаҕа түһэрэн, видеоҕа устан дакаастабыл быһыытынан инспекцияҕа отчуоттанар, — диэн быһаарда Виталий Юрьевич.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина