«Абитуриент- 2024» Өймөкөөн оройуонун ыстааба үлэтин бэс ыйыттан саҕалаабыта.
От ыйын 1 күнүттэн муниципальнай ыстаап кэтэхтэн уонна быһаччы үлэлиэҕэ. Биһиги оройуоммут бэрэстэбиитэлинэн хаһыс даҕаны сылын учуутал Анисья Киприянова үлэлиир.
Улуустааҕы Үөрэх управлениетын дааннайынан, быйыл үрдүк үөрэххэ киириэн баҕарарын 21, ортоҕо 32 выпускник биллэрбит. 9-с кылааһы бүтэрбит 14 оҕо эмиэ үөрэххэ туттарсар санаалаах.
Анисья Викторовна иһитиннэрбитинэн, абитуриеннар бүгүҥҥү күннээххэ култуура, педагогика уонна медицина эйгэтин идэлэрин ордук интэриэһиргииллэр эбит.
Ыстаап тэйиччиттэн үлэлииригэр анаан социальнай ситимҥэ https://chat.whatsapp.com/Cq4bQxTCprI2TTODf9gMKI улуустааҕы бөлөх тэрилиннэ. Бу сайт нөҥүө оҕолорго, төрөппүттэргэ (сокуоннай бэрэстэбиитэллэргэ) уонна учууталларга иһитиннэрии уонна көмө оҥоһуллар.
Итиэннэ 2024 с. орто уонна үрдүк үөрэхтэргэ киирии уларыйыыларын эмиэ сиһилии бу сигэнэн киирэн көрүөххэ сөп: httрs://оймякон-обр.рф/абитуриенту/.
Маны тэҥэ улуустааҕы Үөрэх управлениетын ВКонтакте сайтыгар абитуриеннарга туһалаах иһитиннэриилэри тиһигин быспакка таһаара туруохтара.
Ыстаап бэрэстэбиитэлэ А.В. Киприянова иһитиннэрбитинэн, бу күннээххэ 7 абитуриент үөрэххэ киирии тургутуутугар докумуоннары хайдах быһыылаахтык, ханнык үөрэх кыһатыгар биэриэххэ сөбүн сүбэлэттэ.
Санатар буоллахха, анал үөрэхтээһин тэрилтэлэригэр киирэргэ пааспар куоппуйата, тус сайабылыанньа (маны үөрэх управлениетын сайтыгар киирэн хачайдаан ылыахха сөп), тус дааннайдары обработкалааһыҥҥа сөбүлэҥ, аттестат биитэр диплом куоппуйата, СНИЛС, 4 хаартыска (3х4), ситиһиилэри туоһулуур докумуон куоппуйата (баар буоллаҕына); тус сыаллаах үөрэххэ киирэргэ тэрилтэни кытта түһэрсиллибит уонна сакаастааччы бигэргэппит дуогабарын куоппуйата ирдэнэллэр.
Үрдүк үөрэх кыһатыгар докумуоннары тутуу бэс ыйын 20 күнүттэн от ыйын 25 күнүгэр диэри ыытыллар.
Абитуриент докумуоннарын быйыл уопсай төрүөккэ олоҕуран 5 сиргэ туттарыан сөп, тус сыаллаах үөрэххэ – биир миэстэҕэ.
Өймөкөөн улууһуттан үлэлиир ыстаапка көмө быйылгы эрэ буолбакка, оскуоланы араас сылларга бүтэрбит выпускниктарга эмиэ оҥоһуллар.
Ыстаап бэрэстэбиитэлин кытта билсэр төлөпүөн нүөмэрэ – 8964 417 5678 (Анисья Викторовна).
Биһиги корр.