Дуунньа ааспыт күһүн Уус-Ньараттан Дьокуускайга кэлбитэ, кыра кыыһыгар Уляҕа илии-атах буолан көмөлөһөөрү. Ульяна Вензель уола Рустам Машарипов анал байыаннай дьайыыга сылдьан, улахан бааһырыы ылбыта. Ол ыарахан эчэйии содулуттан эмтэммитэ быйыл үһүс сылыгар барда. Ийэтэ уолун оҕо курдук кичэллээхтик көрөн-истэн бүөбэйдээн, уола атаҕар турдаҕа. Бу сыллар тухары кинилэр наар госпиталларга, реабилитационнай кииннэргэ Санкт-Петербурунан, Москубанан, Дьокуускайынан эмтэнэ сылдьаллар.
Биир үтүө күн мин Ульяна ийэтин Дуунньаны — Евдокия Николаевна Атласованы — көрсөөрү, аралдьыта таарыйа, уруккуну-хойуккуну, сэбиэскэй кэми ахтан-санаан кэпсэтээри киниэхэ дьиэтигэр (таас дьиэ кыбартыыратыгар) тиийдим. Кыыһа уолунаан Рустамныын балыыһаҕа киирбит кэмнэрэ этэ.
Дуунньа төрөппүттэрэ – көс олохтоох эбээннэр. Аҕата Прокопьев Николай Семенович-Пиэрибэй Ньукулай, ийэтэ Ульяна Федоровна Новгородова Томпо улууһуттан тардыылаах дьон этилэрэ. Кинилэр Калинин аатынан колхуоска табаһыттаабыттара. Оччололорго колхуос бэрэссэдээтэлэ Кривошапкин Алексей Прокопьевич этэ. Ити кэмҥэ Төрүт нэһилиэгэр 2 таба ыстаадата баара.
Үлэ бэтэрээнэ, сэрии сылларын оҕото Евдокия Николаевна Атласова (Прокопьева) — Дуунньа маннык кэпсиир:
— Биһиги ийэбит элбэх оҕоломмут, ол эрээри үксүлэрэ кыра саастарыгар ыалдьан өлбүттэр. Ордон хаалбыттан үһүө этибит — убайым Кеша, эдьиийим Агаша – игирэлэр, 1936 с төрүөхтэр. Мин 1941 с. төрөөбүтүм. Билигин соҕотох хаалан сылдьабын.
Биһигини, эбээн оҕолорун, оскуолаҕа ыстаадаттан дьоммут табанан аҕалаллара. Хас хонук, хайдах айаннаан кэлэрбитин олох өйдөөбөппүн. Аан бастаан мин Төрүт оскуолатыгар киирбитим, онтон 4-скэ Тарын 7 кылаастаах оскуолатыгар үөрэнэ барбытым. Учууталларым Акимов В.Р., Матвеев диэн этилэрэ. Паартаҕа Гермогенов Афонялыын (Афанасий Степанович-ГАС) олорбуппун өйдүүбүн. Мин дьыктаан суруйарбын, айылҕа уонна чистописание уруоктарын наһаа сөбүлүүрүм. Физкультура уруогар уһуну, үрдүгү ыстаныы баара, «мостик» түһэрэргэ үөрэтэллэрэ. Сүүрүүнү уонна хайыһардыырбын сөбүлээбэт этим.
Учууталларбыт олус үчүгэй дьон этилэрэ. Балалайкаҕа, гитараҕа, мандолинаҕа, гармошкаҕа оонньуурга үөрэнэрбит. Переменаларга наар көрүдүөр устун иккилии буолан пааралаһан хаамса-хаамса ыллыыр буоларбыт. Учууталларбыт учительскайдарыгар киирэллэрэ.
Тарыҥҥа «Оҕонньор хайатыгар» тахсар этибит. Пионерскай сбордар буолаллара.
Интернаппыт аһа-үөлэ аһары миннигэс буолара, асчыппыт Шура Гермогенова этэ.
18 сааспар аан бастакыбын быыбардаабытым. Ол саас кэргэн тахсыбытым. Вензель Михаил Петрович диэн табаһыт уолга, кини 1933 с. төрүөх этэ — миигиттэн 7 сыл аҕа.
Колхуостан кэргэммин Михаилы уонна Өймөкөөн нэһилиэгиттэн Готовцев Николай, Прокопьев Афанасий диэн эдэр дьону Халымаҕа бэтэринээр үөрэҕэр ыыппыттара. Уолаттар идэлэрин баһылаан кэлэн, табаҕа, ынахха, сылгыга үлэлээбиттэрэ.
Сэрии сылларын оҕотун, тапталлаах ийэ, эбэ, хос эбэ Евдокия Николаевна Атласовва-Прокопьева ахтыытын салгыы “Хотугу сардаҥа” хаһыакка ааҕаарыҥ.
Бэтэрээн кэпсээнин сурукка тистэ Светлана ЕГОРОВА, общ. корр.